Kindle Fire tableti i dytë më i popullarizuar

Edhe pse filloi të shitet vetëm pak kohë më parë, Kindle Fire i Amazon është bërë tableti i dytë më i popullarizuar, menjëherë pas iPad nga Apple.

Sipas të dhënave të cilat i ka grumbulluar kompania ChangeWave Research, 65% e blerësve potencial të tabletit kanë thënë se synojnë të blejnë iPadin e Apple, ndërsa Kindle Fire i Amazon u ngrit në vendin e dytë duke bërë për vete 22% të blerësve potancial të tabletëve. Linja e pajisjeve Galaxy Tab nga Samsung, e cila është në treg për më shumë se një vit, është në vendin e tretë duke tërhequr interesimin e vetëm 4% të blerësve potencial të tabletëve. Asnjë prodhues tjetër nuk arriti të bëj për vete më shumë se 1% të blerësve potencial.

Në mesin e të anketuarve që në hulumtimin e vet i ka përfshirë ChangeWave, 14% e tyre ka thënë se synojnë të blejnë tablet gjatë tri muajve të ardhshëm. Edhe pse kjo është shifër e vogël, kjo është një rritje e dukshme në krahasim me vetëm 6% të anketuarve gjatë muajit gusht që patën thënë se synojnë të blejnë tablet.

Sipas të dhënave të analistëve nga ChangeWave, suksesi i Kindle Fire nuk do të ketë ndikim të madh mbi iPad, por se kryesisht do të ndikoj në rënien e kërkesës për tabletët e kompanive tjera. /Telegrafi/