Këto janë projektet e Ardian Gjinit për Gjakovën (Video)

Kandidati për kryetar komune nga Aleanca për Ardhmërinë e Kosovës, Ardian Gjini në një përballje me kundër kandidaten e tij nga Alternativa Mimoza Kusari-Lila, ka treguar prioritetet e programit të AAK për qeverisje në këtë komunë.

Gjini ka thënë se programi i tij ka të bëjë me ndërlidhjen e të gjitha sferave të jetës si dhe zhvillimin e Gjakovës.

“Programi ynë ka të bëjë me ndërlidhjen e të gjitha sferave të jetës për shkak se bindja jonë e thellë është se një prej problemeve është mungesa e ndërlidhjes mes shkollës, sportit, infrastrukturës etj, ku ka munguar një planifikim afatgjatë dhe investime afatgjate në Gjakovë. Programi jonë ofron vizion për përshpejtim të sferave të jetës. Kemi vërejtur mungesë të menaxhimit. Në qeverisjen time një pjesë  e mirë e investimeve kapitale do të jenë më të vërtet investime, dhe të gjitha këto do të kenë një qëllim, atë për zhvillim. Do të sjellim të hyra në Gjakovë, si dhe qytetarët të shpenzojnë më shumë në Gjakovë”, ka thënë ai.

Gjini po ashtu tha se do t’i thërrasin investitorët me prejardhje nga Gjakova për të investuar në Gjakovë.

“Kemi filluar identifikimin e bashkatdhetarëve tanë jashtë vendit. Do t’i thërrasim investitorët nga jashtë vendit me prejardhje nga Gjakova që të investojnë në Gjakovë”, theksoi ai.

Gjini po ashtu në këtë debat përmendi edhe katër problemet e komunës së Gjakovës, si çështja e impiantit të ujërave të zezave, çështja e ngrohtores, zona industriale dhe hyrjet-daljet. /Telegrafi/