Këshilli i Prindërve të Prishtinës kërkon libra për nxënësit si në vitet paraprake – paralajmëron veprime të tjera

Këshilli i Prindërve të Komunës së Prishtinës është mbledhur për të analizuar gjendjen e krijuar në ciklin e arsimit fillor dhe të mesëm të ulët, pas njoftimit nga MASHTI se nuk do të shpëndahen tekstet mësimore për nxënës nëpër shkolla.

Këshilli ka shprehur shqetësimin e të gjithë prindërve të kryeqytetit për gjendjen e krijuar pas deklaratës së ministres së Arsimit, Arbërie Nagavci, se këtë vit nuk do të ketë shpërndarje të librave për nxënësit e nivelit të klasave I-IX, ashtu siç ka qenë traditë e aplikuar në Kosovë për vite me radhë.

Më tej Këshilli i Prindërve shpreh brengën e thellë dhe ka mëdyshje në propozimin publik të ministres, për të aplikuar ‘Metodën e Rimbursimit’, që është e panjohur dhe pa testuar paraprakisht, dhe si rrethojë mund të jetë e dështuar që në fillim.

Lexo po ashtu Sfidues vlerësohet propozimi i MASHTI-t për tekstet shkollore

“Kjo metodë mund të dështojë kur dihet se shumë prindër nuk kanë llogari në platformën e-Kosova, apo edhe kanë probleme me përdorimin dhe qasjen në pajisje të Teknlogjisë Informative”, thuhet në njërin nga konkluzionet e Këshillit të Prindërve, transmeton Telegrafi.

Sipas këtij Këshilli, problem tjetër i identifikuar është mos posedimi i llogarive bankare nga shumë prindër, dhe probleme të tjera që lidhen me kredi apo procese përmbarimore.

“Kërkojmë nga Ministria e Arsimit që të gjejë zgjidhje të shpejtë dhe praktike në sigurimin e librave shkollor para fillimit të procesit mësimor, 1 shtatorit”, thuhet më tej.

Këshilli i Prindërve të Prishtinës ka paralajmëruar se do të shqyrtojë veprime tjera konform situatës së krijuar, nëse nuk sigurohen librat me kohë nga Ministria e Arsimit sikur vitet paraprake.

Ndryshe, Ministria e Arsimit, Shkencës, Teknologjisë dhe Inovacionit e Kosovës (MASHTI) po e shqyrton mundësinë t’ua transferojë paratë prindërve në mënyrë që ata t’i blejnë pastaj tekstet shkollore për fëmijët e tyre për vitin e ri shkollor, ka thënë të hënën ministrja Arbërie Nagavci.

Deri tani, Ministria i ka blerë librat direkt nëpër shtëpi botuese, nga ku ato u janë shpërndarë nxënësve nëpër shkolla.

Por MASHTI synon ta ndryshojë strategjinë dhe do të vendosë brenda pak ditëve për planin e ri për blerjen e teksteve shkollore për nxënësit./Telegrafi/