Kelmendi shkruan për zhvillimet pozitive në Kosovë, përmend rritjen ekonomike dhe zvogëlimin e papunësisë

Zëvendëskryeministri i Kosovës, Ramiz Kelmendi, përmes një postimi në Facebook ka përmendur ato që ai i ka quajtur “zhvillimet pozitive të Kosovës”.

Sipas tij, shumë ngjarje ekonomike dhe politike të udhëhequra nga qeveria e kryeministrit Isa Mustafa, po sjellin të ardhme të mirë si në aspektin e luftimit të krimit dhe korrupsionit ashtu edhe në aspektin e besimit të investitorëve.

Postimi i plotë i Kelmendit në Facebook:

Kosova dhe zhvillimet pozitive të saj

Qeverisja dhe institucionet të cilat po këndellen në raport me të kaluarën

Fuqizimi ekonomik me rritje të caktuar pozitive ekonomike, më i larti në rajon, me mbi 4 % në dy vite radhazi dhe me trend të rritjes së vazhdueshme duke arritur edhe normën me numër dy shifror gjatë këtij mandati.

Zvogëlimi i papunësisë nga 35 % sa ishte, në 26.2 %, një rritje e punësimit e përcjellë normalisht nga rritja ekonomike.

Pakoja ‘fiskale 1’ e cila ndezi kandilin e kësaj rritjeje dhe hapi rrugën e procesit zhvillimor, me kulminacion rritje ekonomike të sektorit prodhues, që parashihet të arrihet me pakon ‘fiskale 2’, e cila përmirëson gabimet shumëvjeçare të qeverisjeve të kaluara të cilat ndoshta nga pakujdesia apo ndonjë arsye tjetër sanksionojnë sektorin prodhues në veçanti, janë vetëm disa prej shembujve konkret të të arriturave dhe përpjekjeve të pandërprera të qeverisë Mustafa.

Andaj këto dhe shumë ngjarje ekonomike dhe politike të udhëhequra nga qeveria Mustafa, po sjellin të ardhme të mirë si në aspektin e luftimit të krimit dhe korrupsionit ashtu edhe në aspektin e besimit të investitorëve.

Ligji mbi investimet strategjike, shtylla kryesore e negocimit të drejtpërdrejt të qeverisë dhe akterëve të mundshëm ekonomik, do të afirmoi shtimin e besimit tek investitorët me rrjedhojë, një lum të investimeve dhe investitorëve, është shembull tjetër i angazhimit të qeverisë.

Ashtu pra siç është rasti që institucionet dërguan ligjin për transformimimin e Forcës së Sigurisë në ushtri të Kosovës është edhe pakoja ‘fiskale 2’ në funksion të transformimit të ekonomisë prodhuese në gjenerator ekonomik shumë të kërkuar. Fuqizimi i këtij sektori të përmbushë në maksimum zëvendësimin e importeve dhe fuqizimin në tregun ndërkombëtarë.

Është koha e arritjeve të shumta dhe këto arritje po na fuqizojnë edhe karshi shumë tentimeve për destabilizimin e Kosovës nga shtetet jo mike.

Prandaj çdo herë që kemi lajme të mrekullueshme si në lëmin ekonomik sepse kjo e ndalon edhe eksodin e të rinjve dhe shton qëndrueshmërinë e të gjithë qytetarëve që të qëndrojnë në trojet e veta, është normale që edhe komponenta e sigurisë, siguron qytetarët që të jenë të mbrojtur, përveç forcave të fuqishme të NATO-s, edhe me forcat tona që janë të parapërgatitura për çdo sfidë. /Telegrafi/