Kapet me 16 kilogram kokainë, arrestohet shqiptari në Itali

Policia italiane në Perugia, të ndihmuar nga një njësi qensh, kanë përfunduar një operacion të rëndësishëm kundër trafikut të drogës, duke sekuestruar mbi 16 kilogramë kokainë dhe kanë arrestuar një shtetas shqiptar pa precedentë penalë.

Operacioni u zhvillua në një park makinash përpara një qendre tregtare në Castiglione del Lago, ku oficerët kontrolluan një makinë. Shoferi në bord, dukshëm nervoz, ka ngjallur dyshimin e autoriteteve, të cilët janë alarmuar më tej nga sinjalizimi i qenve.

Gjatë kontrollit të makinës u konstatua një anomali teknike, mungesa e pajisjes mbrojtëse të ndarjes së airbag-ut të përparmë, mjet që përdoret zakonisht si vendstrehim për lëndët narkotike. Ky detaj i shtyu oficerët të vazhdonin me një kërkim më të thelluar në shtëpinë e të dyshuarit, gjithashtu në Castiglione del Lago.

Nga kërkimet u gjetën 15 pako kokainë, me një peshë totale mbi 16 kilogramë. Droga, sipas vlerësimeve të hetuesve, ka një vlerë tregu me shumicë prej rreth 500 mijë eurosh, e cila pasi të ishte përzierë dhe shpërndarë në treg, mund të sillte mbi 1.5 milionë euro. Shtetasi shqiptar u arrestua menjëherë dhe u transferua në burgun e Perugia-Capanne.