Pa as një votë kundër dhe abstenim, u miratua projektbuxheti për vitin 2024 në komisionet parlamentare të Kuvendit të Shqipërisë. Buxheti i kalon 7 miliardë euro.
Komisioni i Ekonomisë miratoi sot nen për nen projektbuxhetin duke pranuar dhe kërkesat e disa institucioneve për shtim fondesh, por dhe punonjësish.
Janë pranuar 19 kërkesa të institucioneve për shtim buxheti dhe 2 kërkesa për shtesa punonjësish pa ndikim në rritjen e fondeve, të cilat në total arrijnë vlerën e 1.1 miliardë lekëve.
Ndërkohë, janë rrëzuar të gjitha amendimet e bëra nga opozita.
Pas miratimit në komisione, projektbuxheti 2024 do të kalojë për miratim në Parlament. /Telegrafi/
