Kalaja e Shkupit nxit debate historike

Rindërtimi i një kishte të shekullit 14 në Kalanë e Shkupit ka ngjallur reagime politike dhe historike në Maqedoni. Subjekte shqiptare kanë kërkuar ndërprerjen e ndërtimit duke thënë se kalasë, që simbolizon qytetin, me qëllim kërkohet t’i jepet vetëm karakter i krishterë, me çka do të pretendohet se ajo është pjesë e trashëgimisë maqedonase. Zyrtarë shqiptarë thonë se pjesë e kalasë ka qenë edhe një xhami që qeveria nuk ka në plan ta rindërtojë.

Profesori Bashkim Iseni, ligjërues në Universitetin e Lozanës në Zvicër, studiues i gjenezës së kombit shqiptar në Maqedoni dhe Kosovë, ka thënë për BBC-në se është shqetësues tejtheksimi vetëm i një dimensioni të së kaluarës në një projekt ku financon shteti. Por ai bën thirrje historiografisë shqiptare që trashëgimia ortodokse bizantine të trajtohet edhe si pjesë e trashëgimisë shqiptare, pasi edhe shqiptarët kanë qenë pjesë e saj.

“Është e padyshimtë se një pjesë e mirë e kulturës, identitetit shqiptar, ka të bëjë me kulturën bizantine, në veçanti me kulturën ortodokse e cila shpesh për fat të keq asimilohet si kulturë sllave. Në realitet Bizanti ka qenë një perandori e cila ka mbuluar kultura, gjuhë, civilizime të ndryshme. Për fat të keq historiografia shqiptare, mirëpo edhe ajo më gjerë, nuk i ka kushtuar një vëmendje të veçantë kësaj periudhe e cila për fat të keq konsiderohet si një e kaluar historike që ka të bëjë esencialisht me civilizimin sllav. Por dëshmitë historike flasin të kundërtën”. /Telegrafi/