Kadaj-Bujupi: Ne nuk ndryshojmë parimet si LDK, që ia mbajti “zhagun” PDK-së sa ishte në Qeveri (Video)

Sekretarja organizative në AAK, Donika Kadaj-Bujupi ka thënë se në rrethanat që jemi, Qeveria po vazhdon punën pavarësisht mospajtimeve mes aleatëve.

Kadaj-Bujupi në “Debat Plus” më Ermal Pandurin në RTV Dukagjini ka thënë se asnjë prej subjekteve në Kosovë nuk është shprehur kundër taksës ndaj mallrave serbe.

Deputetja e AAK-së ka thënë se të gjithë kanë qenë bashkë se demarkacioni kishte qenë një gabim i saj kohe, por situata ka ndryshuar pas marrëveshjes me Malin e Zi për një korrigjim të mundshëm të marrëveshjes.

“Marrëveshja është konstatuar e dëmshme në momentin kur dy presidentët e kanë nënshkruar dokumentin për rishikimin e saj [marrëveshjes]…Janë shtuar dy dokumente shtesë, Raporti i Bulliqit dhe marrëveshja mes dy presidentëve”.

Sipas sekretares organizative në AAK, të gjitha subjektet politike janë për ruajtjen e tërësisë territoriale me përjashtim të z.Thaçi.

“Ne po mbajmë qëndrim që nuk do të thotë se nëse je partnerë koalicioni duhet të heqësh dorë nga parimet e tua…LDK-ja i ka mbajt “zhagun” PDK-së sa ishte në Qeveri. Isa më shumë shtynte demarkacionin që e ka nënshkruar Thaçi se “zajednicën” që e ka nënshkruar vet”.

Kadaj-Bujupi thotë se BE-ja ka kërkuar nga Presidenti që Kosova të heq taksën sepse ndoshta e kanë ditur përgjigjen që do t’u jepte Haradinaj.

“Agresioni i vazhdueshëm ekonomik e diplomatikë nga Serbia, sidomos kohëve të fundit, dhe heshtja e BE-së përballë këtij agresioni na ka shtyrë të marrim këtë vendim”.

“…Mund të ketë kosto, mund të ketë presion, por ne mund të qëndrojmë për aq kohë sa jemi bashkë si klasë politike”, deklaroi ndër të tjera Donika Kadaj-Bujupi./Telegrafi/