Zyberaj: Pacolli nuk mund të karantinohet në konviktet e studentëve

Jetlir Zyberaj, këshilltar i ish-ministrit të jashtëm të Kosovës, Behgjet Pacolli, ka thënë ka reaguar lidhur me paralajmërimin se nëse kreu i AKR-së vjen nga Zvicra, mund të përfundojë në karantinë në konviktet e studentëve në Prishtinë.

Zyberaj, përmes një postimi në Facebook, ka thënë se “nëse vjen [Pacolli], vjen direkt nga shtëpia e tij, me avion privat duke respektuar rregullat e udhëzuara në Zvicër”.

“Ideja për karantinë në një konvikt studentor është një model kinez që nuk është aplikuar në vendet e përparuara të Evropës”, ka shkruar ai, përcjell Telegrafi.

Postimi i plotë i Pacollit:

“Behgjet Pacolli ka respektuar rreptësisht rregullat e autoriteteve zvicerane dhe ka qëndruar në shtëpinë e tij në Lugano në mbyllje në javët e fundit që nga shpërthimi i virusit. Ai nëse vjen, vjen direkt nga shtëpia e tij, me avion privat duke respektuar rregullat e udhëzuara në Zvicër.

Si del se autoritetet e Kosovës nuk kanë besim në rregullat e zbatuara nga autoritetet zvicerane?.

Ideja për karantinë në një konvikt studentor është një model kinez që nuk është aplikuar në vendet e përparuara të Evropës”, ka shkruar Zyberaj.

Sot, gjatë ditës mediat raportuan se Behgjet Pacolli mund të kthehet në Kosovë nga shteti i Zvicrës. Kthimi i tij në vendlindje vjen në ditët kur LDK po kërkon parti për të lidhur koalicionin qeverisës për ekzekutivin e ri.

Ministri i Shëndetësisë në detyrë, Arben Vitia, i pyetur nëse duhet që Pacolli t’i respektojë vendimet e Instituti Kosovar të Shëndetësisë Publike të Kosovës, që pasi të hyjë në Kosovë të vendoset në karantinë për 14 ditë, siç bëjnë të gjithë ata që vijnë nga vendet jashtë Kosovës, ka thënë se nuk i takon atij që të përcaktojë përjashtime.

“Ministria e Shëndetësisë mbetet e përkushtuar në mbrojtjen e shëndetit publik të qytetarëve. Shëndeti i qytetarëve tanë është mbi të gjitha. Andaj, që në fillim të shfaqjes së rasteve të para me COVID-19 në vendin tonë, në koordinim të plotë me të gjitha ministritë e linjës, janë përcaktuar rregullat bazuar në rekomandimet e IKSHPK-së”, ka thënë Vitia.

Kreu i Lidhjes Demokratike të Kosovës, Isa Mustafa, ka bërë thirrje që t’i mundësohet kthimi në vend, liderit të AKR-së, Behgjet Pacollit, si deputet dhe përfaqësues i popullit. /Telegrafi/