Japin dorëheqje katër bashkëpunëtorë të kryeministri britanik, Boris Johnson

Shefi i kabinetit të kryeministrit britanik, Boris Johnson, Dan Rosenfield, ka dhënë dorëheqje, ashtu sikurse edhe shefi personal, Martin Reynolds, njoftoi të enjten zyra e qeverisë së Britanisë së Madhe, disa orë pasi u njoftua largimi i dy ndihmësve të tjerë të tij.

“Dan Rosenfield i ofroi kryeministrit sot dorëheqjen, e cila u pranua. Edhe Martin Reynolds e informoi kryeministrin se po jep dorëheqje nga posti i Kryesekretarit Personal dhe kryeministri u pajtua me këtë”, tha zëdhënësi i Johnsonit.

Një zëdhënës tha më herët se këshilltari i kryeministrit për komunikim, Jack Doyle ishte larguar nga qeveria, raporton theguardian.

“Kryeministri i falënderoi ata për “kontributin e tyre të rëndësishëm për qeverinë, veçanërisht në lidhje me punën për pandeminë dhe rimëkëmbjen ekonomike”, tha një zëdhënës e qeverisë.

Johnson humbi gjithsej katër bashkëpunëtorë të enjten, mes një skandali për festat në Downing Street gjatë karantinës, duke dobësuar më tej pozicionin e tij.

Gjatë ditës u njoftua gjithashtu se po largohej Munira Mirza, zyrtare politike në Downing Street.

Në Britaninë e Madhe po dalin në dritë raportet e festimeve të ndjekura nga Johnson dhe bashkëpunëtorët e tij gjatë një “bllokimi” të rreptë që zbatohej për pjesën tjetër të popullsisë. /Telegrafi/