Janjeva në pulla postare të Kosovës

Posta e Kosovës, përmes filatelisë së saj, sot ka lëshuar në qarkullim emisionin e pullave postare “Vendbanimet – Janjeva”, duke ndarë historinë dhe bukurinë e një prej vendbanimeve më të vjetra dhe më unike të Kosovës.

Në njoftimin për media thuhet se dy pulla postare unike vijnë si një urë mes të kaluarës dhe të tashmes, duke e sjellë Janjevën në duart e çdo koleksionisti dhe dashamirësi të kulturës.

“Në to janë paraqitur detajet që e bëjnë Janjevën të veçantë rrugicat e saj të ngushta që flasin për një kohë të shkuar, monumentet shekullore që mbajnë brenda historinë e një komuniteti të gjallë dhe fryma e traditave që ende pulson në çdo cep të këtij vendi të lashtë.

Janjeva është një qytezë në rrafshnaltën e Kosovës, në territorin e komunës së Lipjanit. Ajo shtrihet në një luginë rrëzë maleve të Zhegocit, rreth 12 kilometra në juglindje të Prishtinës. Janjeva nuk është më thjesht një destinacion – ajo bëhet një përvojë. Tani, ajo mund të udhëtojë me ju, duke bartur kujtime, mesazhe dhe dashurinë për kulturën në çdo cep të botës”, thuhet në njoftim. /Telegrafi/