Izraeli hap rrugët për kthimin e palestinezëve në veri të Gazës

Hamasi do të lirojë disa pengje të tjera të enjten, duke përfshirë Arbel Yehoud, pasi ra dakord me Izraelin që palestinezët e zhvendosur do të lejohen të kthehen në Gazën veriore nga sot.

Do të lirohen edhe dy pengje të tjera, përfshirë ushtarin Agam Berger, sipas zyrës së kryeministrit izraelit Benjamin Netanyahu.

Ndërsa tre të tjerë do të lirohen të shtunën sipas marrëveshjes së re.

Bëhet e ditur se Hamasi i dha qeverisë një listë që tregon statusin e të gjithë pengjeve që do të liroheshin në fazën e parë të armëpushimit.

Në këmbim, palestinezët e zhvendosur në Gazën jugore janë lejuar të kthehen në zonat veriore, shkruan skynews, përcjell Telegrafi.

Izraeli gjithashtu do t’i japë Hamasit një listë me 400 të burgosur palestinezë në burgjet izraelite, të cilët janë arrestuar që nga 7 tetori 2023, sipas një zëdhënësi të ministrisë së jashtme të Katarit.

Lexo po ashtu Izraeli nuk i lejon kalimet, mijëra palestinezë të bllokuar në Gaza

Ndryshe, dhjetëra mijëra njerëz u bllokuan të ktheheshin në Gazën veriore pasi Izraeli refuzoi të hapte postblloqe sepse tha se Hamasi kishte shkelur marrëveshjen e armëpushimit.

Izraeli kishte këmbëngulur që Yehoud të lirohej të shtunën sepse ajo është grua, civile dhe e gjallë, dhe për këtë arsye duhet të ishte në kategorinë më të lartë të pengjeve, sipas marrëveshjes.

Kur ajo nuk ishte, postblloqet mbetën të mbyllura.

Edhe pse Yehoud nuk u lirua, katër ushtarë femra izraelite u ribashkuan me familjet dhe 200 të burgosur palestinezë të liruar u pritën si heronj në Bregun Perëndimor.

Ndërkohë sugjerimi i presidentit amerikan, Donald Trump, që Egjipti dhe Jordania të pranojnë refugjatët palestinezë nga Gaza është hedhur poshtë nga të dy vendet.

Ai sugjeroi idenë të shtunën, duke u kërkuar dy kombeve të pranojnë popullsinë palestineze kryesisht të pastrehë, në mënyrë që “ai ta pastronte Gazën”.

E me sa duket këto komente kanë mërzitur edhe mbështetësit e tij arabo-amerikanë në Amerikë. /Telegrafi/