Ivanov akuzon qeverinë, ajo ja kthen përgjigjen

Presidenti Gjorge Ivanov, në fjalimin e tij të fundit tradicional vjetor për deputetët në Kuvend, kërkoi që shumica të heqë dorë dhe të refuzojë marrëveshjen e Prespës, përsëriti se Ligji për përdorimin e gjuhëve ishte jokushtetues dhe u miratua jashtë çdo procedure dhe jashtë organeve kompetente, ndërsa për amnistinë aktuale tha se është bërë për mbështetjen e ndryshimeve kushtetuese përmes shantazheve, përcjell Telegrafi Maqedoni.

Ai tha se ndryshimi midis faljeve së tij në vitin 2016 dhe amnistisë aktuale është në qëllimet. “Qëllimi im ishte pajtimi përmes faljes, ndërsa qëllimi juaj është të siguroni mbështetje për ndryshimet kushtetuese përmes shantazhit. Ndërsa unë vendimin për falje e kam marrë për të parandaluar kaosin në shtet, ju vendimin për amnisti po e bëni për të legalizuar kaosin e shantazhimit dhe shkeljen e sundimit të ligjit”, tha Ivanov.

Për partinë në pushtet LSDM, lajmi i vetëm mirë nga fjalimi i Ivanovit është se ai po shkon, ndërsa tashmë dihet se ai ka konfirmuar rolin e një elementi antiperëndimor dhe antikombëtar.

Nga BDI, deputetët e të cilëve nuk morën pjesë në seancë, thonë se është lajmi i mirë që Ivanovi po shkon. Deputeti Artan Grubi propozoi dje që slogani i OJQ-ve “bojkotojë” të quhet “Ivanov”.

Lexo po ashtu Ivanov në fjalimin vjetor: Kam pasur kërcënime, jam përgjuar pa urdhër gjyqësor

Deputeti Antonio Milloshoski nga radhët e OBRM-PDUKM-së vlerësoi se Ivanov në fjalimin e tij konfirmoi se ai është një politikan i qëndrueshëm i cili i përmbahet parimeve./Telegrafi/