Italia shkatërron rrjetin e trafikantëve

Me urdhër të Prokurorisë së qytetit të Komos, policia italiane ka ekzekutuar një operacion i shtrirë në të gjithë Evropën, i cili ka çuar në arrestimin e 21 personave me akuzën e favorizimit të emigracionit klandestin përmes rrugës ballkanike.

Sipas policisë italiane, personat e arrestuar janë pjesë e një organizate kriminale e përbërë nga 16 shtetas sirianë, 2 tunizianë, 1 libanez, 1 egjiptian e 1 algjerian e rezidentë në Komo, Milano, Belgjikë, Suedi e Francë.

Me anë të një mekanizmi kompleks e të mirëorganizuar, ky grup kriminal përfitonte shuma të mëdha parash duke transportuar me automjete private qindra emigrantë klandestinë nga Hungaria në Austri e Gjermani.

Emigrantët klandestinë ishin kryesisht nga Siria. Policia italiane informon se rreth 100 prej drejtuesve të automjeteve që kanë transportuar emigrantët klandestinë janë identifikuar, e një pjesë e mirë janë arrestuar në flagrancë, falë bashkëpunimit me autoritetet gjermane e austriake.

Gjithashtu hetimet kanë zbardhur transaksione në shuma të mëdha parash adresuar personave, shumë prej të cilëve ende të paidentifikuar e që jetojnë në territorin sirian.