Ish-kryetari i Apelit: Ligji për Byronë përsëri ka shkelje kushtetuese

Partia Demokratike e Kosovës (PDK) ka proceduar në Gjykatën Kushtetuese 16 ligje të miratuara në Kuvendin e Kosovës gjatë seancës së 5 dhjetorit, duke pretenduar për shkelje të rëndësishme procedurale dhe kushtetuese.

Ndër ligjet e dërguara në Kushtetuese është edhe Ligji për Byronë për Verifikimin dhe Konfiskimin e Pasurisë së Pajustifikueshme, i cili më parë ishte shpallur kundër-kushtetues nga Gjykata Kushtetuese.

Ish-kryetari i Gjykatës së Apelit, Hasan Shala, ka kritikuar mënyrën se si Ministria e Drejtësisë e ka trajtuar këtë ligj, duke theksuar se edhe pas ndryshimeve të bëra, ai vazhdon të ketë shkelje kushtetuese.

Sipas tij, problemi kryesor lidhet me mënyrën se si janë bërë ndryshimet në ligj, duke theksuar se Gjykata Kushtetuese kishte shpallur të pavlefshëm të gjithë ligjin, jo vetëm katër nenet që u ndryshuan.

Lexo po ashtu PDK i dërgon 16 ligje në Gjykatën Kushtetuese

Gjithashtu, sipas tij, ka shkelje procedurale edhe në mënyrën se si janë miratuar ligjet nga mazhoranca më 5 dhjetor, përveç se në përmbajtjen e tyre – sikurse Ligji për Byronë.

“Në fillim shkeljet janë procedurale, në mënyrën se si janë miratuar ligjet. E dyta është secili ligj duhet të vlerësohet për nga përmbajtja. E tha ministrja kur u miratua ligji për Byronë ajo tha që ne kemi ndryshuar katër nene. Gjykata Kushtetuese kur e ka kthyer ligjin si antikushtetues, krejt ligji është kthyer si kundër kushtetuese dhe jo katër nene. Prandaj unë mendoj që edhe këtu është shkelja e parë, pasi është dashtë të nxirret një ligj i ri, jo vetëm të ndërrohen katër nene, të cilat ata mendojnë që janë kundër kushtetuese”, ka thënë Shala në RTV Dukagjini.

Ministrja e Drejtësisë, Albulena Haxhiu në një konferencë më 3 shtator, kishte njoftuar për katër nenet e rishikuara, të cilat sipas saj, adresojnë gjetjet kryesore të Gjykatës Kushtetuese.

Ajo kishte përmendur si ndryshime kryesore eliminimin e retroaktivitetit të ligjit, përcaktimin e periudhës kohore për verifikimin e pasurisë, si dhe ristrukturimin e përbërjes së Komisionit mbikëqyrës për ndarjen e pushteteve.