Ish agjenti i SHIK-ut ftohet si dëshmitar për vrasjet e pasluftës (Dokument)

Naim Miftari, ish agjent i SHIK-ut, përmes një njoftimi në Facebook, ka bërë të ditur se me urdhër të Kryeprokurorit Special të Kosovës sot ka qenë i ftuar si dëshmitar në policinë e Kosovës.

Sipas tij, ftesa kishte të bënte me vrasjet e pasluftës, atentatet e dosjet e ndryshme.

“Me urdhër të Kryeprokurorit special të Kosovës, sot isha i ftuar në cilësinë e dëshmitarit në policin e Kosovës. Ftesa kishte të bënte me temat e shumë vrasjeve të pas luftës, atentateve, dosjeve,.. dhe ndodhive negative në vendin tonë” (sic.), ka shkruar Miftari.

Ai më tej thotë se për sa kohë është president Hashim Thaçi dhe Kadri Veseli në pushtet, prokurorët dhe hetuesit i zgjedh me telefon Adem Grabovci, të cilin ai e quan postier të Thaçit e Veselit.

“Sa i përket pyetjeve dhe përgjigjeve duhet kuptuar se sa kohë e kemi president Hashim Thaçin dhe Kadri Vesein në pushtet dhe për sa kohë prokurorët, gjyqtarët, hetuesit dhe komandantët e policisë i zgjedh me telefon Adem Grabovci, postieri i këtyre dy të parëve nalt. Përgjigjet unë si qytetar i Kosovës do të jen gjithmonë të rezervuara, pasi bashkëpunimi i ndërsjellët qytetar-shtet bëhet vetëm kur si qytetar i beson plotësisht sistemit shtetëror dhe ligjor e kur je i bindur se drejtësia behet vetëm me ligj (jo me dosta) dhe kur je i sigurt ti familja e juaj dhe fëmijët e tu se nuk do vriteni nga dora e zgjatur e para politikes që sundon sot politiken dhe shtetin.. Sjellja e Policisë ka qenë korrekte dhe shumë profesionale”, (sic.) ka bërë të ditur Naim Miftari, ish agjent i SHIK-t, transmeton “Bota Sot”.