Instituti EPIK: Në vitin 2018, 1/3 e detyrimeve të MSA-së nuk zbatohen

Instituti EPIK ka trajtuar programin kombëtar për zbatimin e Marrëveshjes së Stabilizim Asocimi, ku Kosovë në baza vjetore ka pasur regres të vazhdueshëm në numrin e reformave të parapara, dhe të zbatuara.

Kështu thuhet në një njoftim për media nga, Instituti EPIK.

Në njoftim thuhet se marrëveshja e Stabilizim Asociimit (MSA) hyri në fuqi më 1 prill 2016, ku Kosovës në këtë kuadër ka marr për detyrim që të zbatoj dispozitat e MSA-së brenda periudhës dhjetë vjeçare.

“Me qëllim zbatimit të dispozitave të MSA-së, Kosova miraton çdo vjet Programin Kombëtar për Zbatimin e MSA-së.  Programi Kombëtar për Zbatimin e MSA-së (PKZMSA) është dokument kyç i institucioneve të Republikës së Kosovës i cili ka për synim zbatimin e detyrimeve të Kosovës që burojnë nga MSA. Kërkesa për hartimin e Programit buron nga neni 74, pika 3 e MSA-së. Dokument të tillë, nën emërtime të ndryshme, e kanë në fuqi të gjitha vendet e rajonit që janë pjesë e procesit të Stabilizim Asocimi, psh. në Shqipëri: Plani Kombëtar për Integrim Evropian, në Serbi: Programi Kombëtar për Adoptimin e Acquis apo në Mal të Zi: Programi Kombëtar për Anëtarësim në BE.

Përgatitja e Programit koordinohet nga Ministria e Integrimit Evropian. Ky program përmban masa konkrete të cilat propozohen nga vet institucionet e shtetit për të adresuar dispozitat e veçanta të MSA-së.

Në këtë kontekst, në baza vjetore ka pasur regres të vazhdueshëm në numrin e reformave të parapara, dhe të zbatuara.

Në bazë të statistikave të vetë institucioneve:

Në vitin 2016, programi kishte 1,347 masa – nga të cilat institucionet arritën të përmbushin 741.

Në vitin 2017, programi kishte 967 masa – nga të cilat institucionet arritën të përmbushin 600.

Në vitin 2018, programi kishte 532 masa – nga të cilat institucionet arritën të përmbushin 362”, thuhet në njoftim.

Sipas njoftimit të këtij instituti, krahasuar më vitin 2016, në vitin 2018 ka numër më të vogël të masave të parapara dhe të zbatuara në kuadër të implementimit të dispozitave të MSA-së.

“Respektivisht në vitin 2016, janë zbatuar 741 masa nga 1,347 sa ishin gjithsej, ndërsa në vitin  2018, numri masave të zbatuara ka rënë në 362 nga 532 masa te planifikuara – që i bie  se nuk është arritur të përmbushet 1/3 e planifikimit vjetor për vitin 2018”, thuhët ndër të tjera në njoftimin e Institutit EPIK. /Telegrafi/