Iniesta: Do të doja që këto ndjenja të ishin të përhershme

Andres Iniesta i është gëzuar titullit të fundit të La Ligas me fanellën e Barcelonës dhe natyrisht se ky është një prej çasteve që do ta mbajë mend shumë gjatë.

Mjeshtri spanjoll i mesfushës të premten bëri të ditur se do të largohet nga skuadra, të cilës ia fali gjithë karrierën si lojtar profesionist.

Dhe natyrisht se të dielën mbrëma, kur Blaugranët e fituan titullin për edicionin 2017/2018 në kampionatin spanjoll, i gjithë stadiumi Riazor i duartrokiste numrit 8.

Lexo po ashtu Të gjitha lajmet për Andres Iniestan

“Është një ndjenjë që nuk shkruhet, si në aspektin personal, ashtu edhe si sportist, nuk ka fjalë që mund ta shprehin këtë dashuri të madhe nga njerëzit, madje edhe në momente të vështira (pasi Deportivo La Coruna ra nga liga)”.

“Një falënderim të përjetshëm, sepse është gjë shumë e bukur. Kjo lëvizje nuk ka të bëjë me ndërrimin e opinionit, por jam duke e bërë vendimin më të sinqertë për mua dhe për klubin”.

“Përfundimi i sezonit me këto ndjenja para Kampionatit Botëror dhe me një aventurë tjetër përpara, do të doja të ishte e përjetshme. Do të doja të mos përfundonte kurrë, por gjithçka ka një fillim dhe një fund”, ka deklaruar Don Andres.

Kapiteni do t’i zhvillojë edhe katër ndeshje si lojtar i Barcelonës para se t’i japë fund qëndrimit 22 vjeçar në Camp Nou. /Telegrafi/