IKSHPK iu bën apel qytetarëve të kenë kujdes nga rriqrat

Instituti Kombëtarë i Shëndetësisë Publike të Kosovës u ka bërë thirrje qytetarëve që të kenë kujdes nga rriqrat.

Përmes një postimi në Facebook, ata kanë dhënë edhe disa këshilla për qytetarët e komunave endemike, që duhet të ndiqen gjatë këtij viti.

Në përgjithësi, IKSHPK-ja ka rekomanduar që qytetarët të mos qëndrojnë në livadhe dhe vende me shkurre si dhe të mbajnë higjienën.

Rekomandimet e IKSHPK-së për mbrojtje nga ethet hemorragjike Krime-Kongo

Mos qëndroni gjatë dhe pa nevojë në livadhe dhe vende me shkurre,

Nëse patjetër duhet të jeni të pranishëm në këto vende vesh rroba të gjata dhe pantallonat futni në çorapë,

Duhet të përdorni preparate me të cila lyejmë pjesët e trupit të cilat i dëbojnë insektet nga trupi i njeriut e sidomos në pjesët e zbuluara të trupit, (shuplakat, qafën),

Kontrolloni trupin mos keni ndonjë rriqër gjatë qëndrimit në vatër,

Kontrolloni përsëri trupin pas largimit nga livadhi apo vendet me shkurre,

Nëse keni rriqër në trup ofrohuni në qendrën më të afërt mjekësore sa më shpejt,

Kositja e barit të bëhet në vazhdimësi (oborr dhe livadhe),

Pastrimi dhe dezinfektimi i stallave të bëhet në vazhdimësi,

Mbajtja e higjienës personale në nivelin më të lartë.