Ibishi deklarohet pas ftesës për intervistim nga Gjykata Speciale

Ish-luftëtari i UÇK-së, Nuredin Ibishi ka thënë se ka pranuar ftesën për intervistim nga Gjykata Speciale në Hagë.

Ibishi përmes një postimi në Facebook, ka shkruar se intervistimi do të bëhet në mesin e muajit nëntor 2019, transmeton Telegrafi.

Ai ka thënë se si në shumë procese të deritashme, ai dhe bashkëluftëtaret e tij do të dëshmojnë se lufta e UÇK-së ka qenë e drejtë dhe se do të mbetet e tillë.

“Ashtu siç e zhvilluam luftën për liri dhe triumfuam falë mbështetjes së popullit të Kosovës dhe ndihmës së Aleancës Ndërkombëtare të prira nga SHBA, edhe kësaj radhe do të dalim faqebardhë. Faleminderit për mbështetjen e vazhdueshme”, ka shkruar ai.

Ndërkohë numri i personave të ftuar deri më tani nga Gjykata Speciale ka arritur të kalojë shifrën 100, teksa pjesë e intervistimeve ishin edhe figurat e rëndësishme të skenës politike në vend, si: kryeministri në detyrë Ramush Haradinaj, ish-komandanti i Zonës Operative të Llapit, Rrustem Mustafa dhe ish-komandanti Sami Lushtaku, një ndër udhëheqësit kryesorë të Noredimës, Shukri Buja, Time Kadrijaj, Sylejman Selimi e shumë ish-pjesëtarë të tjerë të UÇK-së. /Telegrafi/