Ia drejton armën një të mituri, arrestohet një person në Ferizaj

Të hënën në mbrëmje rreth orës 21:00, Policia e Kosovës për rajonin e Ferizajt ka arrestuar një person me inicialet G.H, i moshës 38 vjeçare pasi kishte sulmuar një të mitur (14 vjeç) me inicialet A.S, në rrugën “Driton Islami”, në Ferizaj.

Sipas një njoftimi për media, thuhet se policia ka reaguar menjëherë duke shmangur rrezikun e drejtpërdrejt, duke ia hequr të dyshuarit armën nga dora, e cila i ishte drejtuar të miturit.

“Mbrëmë, rreth orës 21:00, Policia rajonale e Ferizajt ka pranuar një informacion se në lagjen ’Iliria’, në rrugën ’Driton Islami’, në Ferizaj një person me inicialet A.S ( M/K) i moshës 14 vjeçar ishte sulmuar nga një person tjetër me inicialet G.H ( M/K) i moshës 38 vjeçar.

Policia e stacionit në Ferizaj, policët e rendit dhe policët hetues menjëherë i janë përgjigjur kësaj informate dhe kanë arritur në vendin e ngjarjes e cila ishte në proces. Reagimi i policisë ka qenë shumë i shpejtë, duke shmangur rrezikun e drejtpërdrejt, policët arrijnë që nga i dyshuari G.H të ia heqin nga dora armën e zjarrit, i cili e kishte të drejtuar kundrejt viktimës A.S dhe ta arrestojnë atë”, thuhet në njoftim.

Ndërkaq, bëhet e ditur se si provë materiale policia ka konfiskuar: një armë të zjarrit (pistoletë),një karikatorë me katër fishekë dhe një mjetë të mprehtë i kombinuar (dara) .

“I dyshuari është shoqëruar në stacionin e policisë në Ferizaj dhe pas intervistimit nga policët hetues, me vendim të Prokurorit nga Prokuroria Themelore në Ferizaj, i njëjti është dërguar në mbajtje për 48 orë për procedura të mëtejme hetimore, ndërsa rasti është cilësuar ‘Mbajtje në pronësi, kontroll, ose posedim i paautorizuar i armës dhe kanosje’, thuhet ndër të tjera në njoftim. /Telegrafi/