Hoti: Deklaratat fyese të Veselit e Haradinajt kundër Blakajt shpërfaqin mendësinë e tyre politike

Shefi i Grupit parlamentar i Lidhjes Demokratike të Kosovës, Avdullah Hoti ka thënë sot se deklarimet fyese dhe denigruese të Kadri Veselit dhe Ramush Haradinaj ndaj ish prokurorit Elez Blakaj shpërfaqin mendësinë tyre politike dhe janë dëshmi e qartë për dorën e zgjatur të tyre në sistemin e drejtësisë.

Hoti në një postim në rrjetin social Facebook shkruan se vetëm qytetarët e Kosovës mund tu japin fund historive të tilla dhe të hapin një faqe të re për gjeneratat e ardhshme.

Lexoni të plotë postimin e Hotit në Facebook:

“Kriza institucionale në Kosovë është thelluar gjatë verës dhe situata është alarmante.

Shqetësimet e prokurorit të larguar në SHBA të bëra publike nga vetë ai, vërtetojnë dyshimet se sistemi i drejtësisë në Kosovës ka deformime alarmuese. Ndërhyrjet nga jashtë e pamundësojnë funksionimin e pavarur të këtij sistemi.

Listat e fryra të veteranëve po na kushtojnë miliona euro të buxhetit të varfër të Kosovës. Këto lista të fryra janë fyerje për të gjithë luftëtarët e lirisë, të gjallë, të rënë e invalidë.

Deklarimet fyese dhe denigruese të Z.Veseli dhe Z.Haradinaj ndaj ish prokurorit Blakaj shpërfaqin mendësinë tyre politike dhe janë dëshmi e qartë për dorën e zgjatur të tyre në sistemin e drejtësisë. Ndryshe përse duhej të reagonin ata ndaj shqetësimeve të ngritura të një ish prokurori. Këto deklarime e kanë shqetësuar BE-në, e cila monitoron pavarësinë e institucioneve të drejtësisë në Kosovë.

Në anën tjetër, deklarimet kundër kushtetuese, të dhëna në baza ditore, të Z.Thaçi për shkëmbim territoresh e korrigjim kufijsh kanë krijuar pasiguri tek qytetarët dhe miqtë tanë ndërkombëtarë.

Kjo gjendje alarmuese që po mbizotëron sot nuk është pa autorësi. Drejtësia do të vendoset. Protesta dinjitoze e qytetarëve, e nxitur nga shoqëria civile, është hapi i parë shumë domethënës në drejtim të stopimit të së keqes.

Kjo gjendje krize nuk është pa rrugëdalje. Dalja nga kriza kërkon ballafaqim dhe llogaridhënie ndaj qytetarëve të atyre që e kanë krijuar këtë gjendje. Të tjerat i mbesin sistemit të drejtësisë, i cili sistem në kontekstin e ri politik do të funksionojë lirshëm.

Do të sigurohemi që kjo të ndodh sa më shpejt. Do të punojmë shumë dhe do të bashkëpunojmë me të gjitha forcat politike që ja duan të mirën vendit.

Vetëm qytetarët e Kosovës mund tu japin fund historive të tilla dhe të hapin një faqe të re për gjeneratat e ardhshme”. /Telegrafi/