‘Hidrodrini’ e kthen cisternën e palëvizshme në vepër arti

KRU “Hidrodrini” në Pejë ka njoftuar se nxënësit e  Shkollës së Mesme të Lartë të Arteve Aplikave ‘Odhise Paskali’ kanë ‘fisnikëruar’ cisternën e palëvizshme të ujit, duke i dhënë pamje të nivelit të lartë artistik me pikturimin e motivit të derdhjes së Lumbardhit nga Bjeshkët e Nemuna, përkatësisht Gryka e Rugovës.

Në njoftimin e bërë për media thuhet se këtë vepër arti e kanë realizuar disa nxënëse të dalluara, transmeton Telegrafi.

“Duke përdorur teknikën Acrilic e cila i reziston kushteve atmosferike, këtë pikturë arti në cisternë, e kanë paraqitur nxënëset e dalluara, të kësaj shkolle, drejtimi dizajn grafik; Nina Grapci, Bijona Gashi, Erblina Shoshi dhe Argita Dervishaj, e nën përkujdesje të Drejtorit prof. Bujar Kelmendi. Kjo vepër arti, mbartë në vete përvojën e gierë të marrëdhënieve njerëzore me botën e jashtme – njerëzit e tjerë, natyrën dhe gjërat”, thuhet në njoftim.

Tutje, KRU “Hidrodrini” thekson se vepra është realizuar nën moton; Ta kursejmë ujin – ta duam natyrën!

“Cisterna bashkë me pikturën, padyshim se nga sot do mbeten aset i çmuar i ambienteve të KRU ‘Hidrodrini’ dhe mesazh i fuqishëm -dëshmi kohe-, e vlerave dhe rëndësisë së ruajtjes së ujit”, vijon njoftimi. /Telegrafi/