Haxhiu e pyeti për vaksinat anti-COVID pa afat, Latifi: S’kemi hedhur asnjë, por kemi me i hedh gjithsesi

Ministri i Shëndetësisë, Rifat Latifi, deklaroi sot se Kosova nuk do të mund t’i përdorë të gjitha vaksinat kundër coronavirusit që ka në dispozicion pa iu skaduar afati dhe sipas tij, nuk është vendi i vetëm që s’mund ta bëjë këtë.

Duke iu përgjigjur deputetit të Partisë Demokratike të Kosovës, Bekim Haxhiut, në lidhje me skadimin e afatit të vaksinave, ministri tha se nuk është hedhur asnjë, gjithsesi kjo do të ndodhë sepse do t’iu skadojë afati.

Ai tutje tha se me rregulloret ndërkombëtare nuk është e lejuar që një shtet të ia jap vaksinat një shtetit tjetër.

“Nuk është vetëm Kosova shteti që nuk do të mund t’i përdor të gjitha vaksinat që ne i kemi marrë. Fatkeqësisht me rregulloret ndërkombëtare nuk është e lejuar që një shtet të ia jap vaksinat një shtetit tjetër.

“Unë nuk jam absolutisht i kënaqur me këtë, por edhe gjithë të tjerët kanë për të humbur vaksina. S’kemi hedhur asnjë, por kemi me i hedh gjithsesi sepse do t’iu skadojë afati”, u shpreh ai.

Deputeti Haxhiu e pyeti ministrin Latifi edhe për diplomaci mjekësore, derisa mjekët po ikin jashtë vendit.

Në këtë pyetje, Latifi dha një përgjigje përgjithshme, duke thënë se rrugëtimi i transformimit të shëndetësisë nuk është i lehtë por është i mundur. /Telegrafi/