Harris ‘qorton’ Netanyahun – ka një mesazh të fuqishëm për izraelitët dhe palestinezët

Kamala Harris tha se ajo “nuk do të heshtë” për situatën e rëndë humanitare në Gaza pas një takimi me kryeministrin e Izraelit.

Kandidatja e mundshme e partisë demokratike për presidente të SHBA-së tha se ajo ngriti “shqetësime serioze” me Benjamin Netanyahu në diskutimet në Shtëpinë e Bardhë.

Takimi erdhi pasi Netanyahu u takua me presidentin amerikan, Joe Biden, i cili po bën presion për një armëpushim dhe marrëveshje për lirimin e pengjeve që duhet të nënshkruhet nga Izraeli dhe Hamasi, raporton skynews.

Lexo po ashtu Sondazhi i New York Times - kush po udhëheq, Harris apo Trump

Duke komentuar bisedën me udhëheqësin izraelit, 59-vjeçarja tha se Izraeli ka të drejtë të mbrohej, por shtoi qartë, “sa ka rëndësi se si e bën këtë”.

Mbështetja për Izraelin nga administrata e Bidenit është kritikuar në SHBA me protesta në kampuset universitare dhe në Uashington, transmeton Telegrafi.

Ndërsa Harris e përshkroi Hamasin si një “organizatë brutale terroriste”, sulmi i së cilës nisi luftën më 7 tetor ndaj Izraelit, pati momente kur thoshte se SHBA-ja priste shumë më tepër nga Netanyahu.

Duke iu referuar situatës në Gaza, ajo tha se “unë gjithashtu shpreha me kryeministrin shqetësimin tim serioz për shkallën e vuajtjes njerëzore në Gaza, duke përfshirë vdekjen e shumë civilëve të pafajshëm.

Lexo po ashtu Netanyahu me vizion të 'ri' për Lindjen e Mesme

“Dhe e bëra të qartë shqetësimin tim serioz për situatën e tmerrshme humanitare. Me mbi dy milionë njerëz që përballen me nivele të larta të pasigurisë ushqimore dhe gjysmë milioni njerëz përballen me nivele katastrofike të pasigurisë akute ushqimore, ajo që ka ndodhur në Gaza gjatë nëntë muajve të fundit është shkatërruese. Imazhet e fëmijëve të vdekur dhe njerëzve të dëshpëruar e të uritur që ikin për siguri, ndonjëherë të zhvendosur për herë të dytë, të tretë apo të katërt… Ne nuk mund të shikojmë larg përballë këtyre tragjedive. Nuk mund ta lejojmë veten të mpihemi nga vuajtjet. Dhe unë nuk do të hesht”, pohoi ajo.

Ndoshta e vetëdijshme se ajo tashmë është efektivisht në një fushatë zgjedhore, ajo dha detaje të marrëveshjes së propozuar të armëpushimit, duke përfshirë lirimin e pengjeve të mbetura, disa prej të cilëve janë amerikanë.

Ajo tha se hapi i parë do të ishte një “armëpushim i plotë” i cili do të përfshinte tërheqjen e ushtrisë izraelite nga qendrat e popullsisë në Gaza.

Faza e dytë do të shihte tërheqjen ushtarake izraelite nga e gjithë Gaza, duke çuar në një “përfundim të përhershëm të armiqësive” dhe lirimin e pengjeve.

“Është koha që kjo luftë të përfundojë dhe të përfundojë në një mënyrë ku Izraeli të jetë i sigurt, të gjithë pengjet të lirohen, vuajtjet e palestinezëve në Gaza të marrin fund dhe populli palestinez të mund të ushtrojë të drejtën e tij për liri, dinjitet dhe vetëvendosje. Dhe në fund, unë mbetem e përkushtuar ndaj një rruge përpara që mund të çojë në një zgjidhje me dy shtete”, shtoi kandidatja e mundshme demokrate për presidente.

Lexo po ashtu Qindra krimba dhe insekte në hotelin ku po qëndron Netanyahu

Kjo është diçka që Netanyahu e ka refuzuar vazhdimisht, duke pretenduar se kjo cenon sigurinë e Izraelit.

Harris i kishte përshkruar diskutimet e saj me kryeministrin izraelit si “të sinqerta” dhe deklarata e saj pas takimit përmbante një element qortimi për Netanyahun.

Ndryshe, Netanyahu do ta takojë sot kandidatin republikan, Donald Trump në resortin e tij Mar-a-Lago në Florida. /Telegrafi/