Haradinaj tejkalon parashikimet e Bankës Botërore, thotë se rritja ekonomike do të shkojë deri në 7%

Kryeministri i Kosovës, Ramush Haradinaj, ka thënë se Kosova e ka rritjen më të madhe ekonomike në Ballkanin Perëndimor.

Haradinaj përmes një postimi në Twitter, ka thënë se me ndërtimin e termocentralit “Kosova e Re”, kjo rritje do të shkojë deri në 7 për qind.

“Kjo marrëveshje parasheh një investim prej 1.3 miliard euro, që do të garantojë pavarësi energjetike”, ka shkruar Haradinaj, përcjell Telegrafi.

#Kosovo has the largest economic growth in the #WesternBalkans by 4.5%. With the construction of #KosovaeRePowerPlant by @ContourOfficial this growth is expected to reach 7%. This contract provides an investment of 1.3 billion €, which will ensure Kosovo’s energy independence.

— Ramush Haradinaj (@haradinajramush) January 24, 2019

Mirëpo, sipas raportit të fundit të prezantuar nga Banka Botërore, Kosova pritet të ketë rritje ekonomike prej 4.5 për qind për tre vitet e ardhshme.

Lexo po ashtu Banka Botërore parashikon rritje ekonomike prej 4.5% në tri vitet e ardhshme në Kosovë

“Rritja ekonomike e parashikuar për vendet tjera të Ballkanit Perëndimor është: Shqipëria me 3.6 për qind në 2019 dhe 3.5 për qind në vitet 2020 dhe 2021; Maqedonia me 2.9 për qind në 2019, 3.2 për qind në 2020, 3.3 për qind në 2021; Serbia me 3.5 për qind në 2019, 4.0 për qind në vitet 2020 dhe 2021; Mali i Zi me 2.8 për qind në 2019, 2.5 për qind në vitet 2020 dhe 2021; Bosnja e Hercegovina me 3.4 për qind në 2019, 3.9 për qind në 2020, 4.0 për qind në 2021”, thuhet në raport, përcjell Telegrafi.

Raporti “Gjasat Botërore Ekonomike”, i publikuar këtë muaj, parashikon ulje të rritjes ekonomike në botë duke përfunduar se “aktiviteti i zvogëluar ekonomik dhe rreziqet e shtuara po mjegullojnë gjasat botërore ekonomike”. /Telegrafi/