Haradinaj: Kontributi dhe përkushtimi i NATO-s, garancë për paqe dhe siguri në rajon

Kryeministri i Kosovës, Ramush Haradinaj, ka marrë pjesë në ceremoninë e Ndërrimit të Drejtorit të NALT-it, Gjeneral Brigade Uwe A. Becker të cilin nga tash do ta zëvendësojë gjeneral brigade, Michael Oberneyer.

Haradinaj ka theksuar se është shumë e rëndësishme që të kemi besimin e NATO-s.

Para të pranishmëve, kryeministri Haradinaj duke vlerësuar lartë kontributin e gjeneralit Becker, tha se sot jemi të gjithë bashkë që të shprehim respekt për shërbimin e më shumë se dhjetë muajsh në vendin tonë të gjeneral brigade Uwe Becker.

Kryeministri Haradinaj gjatë fjalës veçoi se është takuar në disa raste me gjeneralin Becker dhe se sot është momenti që t’i shpreh falënderim për shërbimin, në emër të tij dhe të popullit të Kosovës, pasi ky siç tha ai, është një moment special që popullit gjerman t’i themi faleminderit për kontributin e tyre të më shumë se 20 vite që nga koha e tragjedisë e deri sot.

Ndër tjerash, kryeministri Haradinaj shtoi se Kosova ka një synim, bashkimin e kësaj familjeje dhe në këtë drejtim është duke u bërë një punë shumë e vështirë jo vetëm që të fitohet besimi por edhe të jemi të pranueshëm.

“Ne i takojmë botës së paqes të udhëhequr nga Amerika sepse me luftën tuaj ju qëndruat në të drejtën tonë dhe ndalet tragjedinë e asaj kohe duke na ndihmuar neve që sot të jemi këtu”, tha kryeministri Haradinaj.

Kryeministri Haradinaj gjeneralit Becker ia ndau medaljen e kryeheroit Gjergj Kastrioti Skënderbeu për meritat e veçantë gjatë shërbimit në Kosovë.

Drejtori i NALT-it, gjeneral Brigade Uwe Becker, falënderoi institucionet për bashkëpunimin, duke thënë se gjatë detyrës së tij si drejtor i NALT, Kosova mori vendimin per të filluar tranzicionin gradual të FSK-së. Siç tha ai, me miratimin e mandatit të ri të FSK-së, aleatët kanë filluar procesin e rishqyrtimit të nivelit të angazhimit të NATO-s me FSK-në, proces ky që është në vazhdim e sipër.

“Në kuadër të mandatit tonë, ne kemi vazhduar të punojmë krah për krah me kolegët tanë të FSK-së në një mjedis të privilegjuar të transparencës dhe çka është më e rëndësishmja të besimit”, tha gjeneral brigade Becker.

Në këtë ceremoni nga një fjalë e mbajtën edhe ministri i Mbrojtjes, Rrustem Berisha, komandanti i FSK-së, gjenerallejtënant, Rrahman Rama, komandanti i KFOR-it, gjeneral Lorenzo D’Addario dhe drejtori i ri i NALT-it, gjeneral brigade, Michael G.Oberneyer./Telegrafi/