Hadergjonaj drejt rikthimit në Bundesliga, Dortmundi e gatshme të shpenzojë për të

Florent Hadergjonaj është duke kaluar nëpër një formë të mrekullueshme.

Mbrojtësi i djathtë nga Kosova ka shkëlqyer këtë edicion në elitën e futbollit anglez, Ligën Premier.

Skuadra e tij Huddersfield ditë më parë aktivizoi klauzolën e blerjes për pesë milionë euro nga skuadra gjermane Ingolstadt.

Por Florenti së shpejti mund të rikthehet në kampionatin gjerman tek një skuadër shumë më e madhe se Ingolstadt.

Borussia Dortmund është duke kërkuar me ngulm trajnerin e Huddersfieldit, David Wagner.

Amerikano gjermani ka qenë edhe më parë në Dortmund nga viti 2011 deri më 2015 ku drejtoi ekipin B të verdhezinjve, shkruan Telegrafi.

Paraqitjet e mira të skuadrës së tij në Ligën Premier kanë bërë që krerët e Dortmundit ta shohin si favoritin për ta marrë drejtimin e skuadrës.

Sipas medieve gjermane Wagner pritet të zyrtarizohet si trajner i Dortmundit pas përfundimit të stinorit në Ligën Premier.

Por 46-vjeçari nuk pritet të shkoj i vetëm në Dortmund, pasi me vete do ta marrë edhe Florent Hadergjonajn.

Hadergjonaj pritet të jetë zëvendësues i polakut Lukas Piszczek në krahun e djathtë të mbrojtjes.

33-vjeçari ka edhe një vit kontratë me Borussian dhe nuk është duke kaluar nëpër një formë të mirë.

Për transferimin e Hadergjonajt besohet se Dortmund do të paguajë rreth 10 milionë euro.
23-vjeçari në 21 ndeshje me Huddersfieldin ka arritur të asistoj dy herë.

Dortmund e shikon Hadergjonajn si zëvendësues të Piszczekut, pasi mbrojtësi nga Deçani kishte shkëlqyer në Bundesliga një vit më parë me fanellën e Ingolstadit ku shënoi një gol dhe bëri katër asistime. /Telegrafi/