Guvernatori Bogov mbron hapjen e xhirollogarive jashtë vendit

Ngjarjen në të cilën u njoftua për lidhjen e bursave të Maqedonisë, Kroacisë, Bullgarisë, Serbisë dhe Sllovenisë, Guvernatori Dimitar Bogov e përdori për mesazhe politike, njofton Alsat-m. Ai iu drejtua analistit Sasho Ordanovski dhe deri te disa media që u interesuan dhe e kritikuan vendimin e BPRM-së që të lejojë qytetarët e Maqedonisë të kenë gjiro llogari jashtë shtetit edhe atë para zgjedhjeve, transmeton Telegrafi Maqedoni.

“Sasho Ordanovski akoma nuk ka dëgjuar për LINK-un SEE. Po ta dijë se bursa hap portë të transferimit të kapitalit jashtë vendit, menjëherë do të dërgojë protestues para bursës, siç më kërcënoi mua se do të dërgojë para BPRM-së. E pastaj kur Telma të pyes: Dhe, pse pikërisht tani? Sikurse tani duhet të ndalojmë të gjitha aktivitetet. Shakanë mënjanë, derisa disa mbjellin mjegull dhe trillojnë teori të konspiracionit, disa punojnë në përmirësimin e situatës në sektorin financiar”, deklaroi Dimitar Bogov, Guvernator i BPRM-së.

Bogov personalisht ka reaguar pasi Ordanovski ka kritikuar vendimin e BPRM-s, që të lejojë qytetarët e Maqedonisë të kenë llogari në bankat e huaja. Për Ordanovskin kjo është një mënyrë se si funksionarët ti nxjerrin jashtë vendit miliardat e marra nga provizionet në vend. Guvernatori Bogov i mësoi mediat se si duhet ti përmirësojnë standardet e programeve që i transmetojnë.

“Ndoshta televizionet mund ta blejnë serinë e njohur “Lugina e silikonit ” në vend të një seriali turk tjetër apo indian apo edhe një shou real, të paktën të rinjtë do të kenë ide të mençura biznesi, në vend të asaj si të bëhen ujq, starleta apo nuse të përlotura”, tha Bogov.

Fjalimi i Bogovit ishte në shënimin 20 vjetorit të Bursës së Maqedonisë, ku zyrtarisht u promovua lidhja rajonale mes bursave. Risia është se tani qytetarët e Maqedonisë do të jenë në gjendje të blejnë aksione direkt në kompani të huaja, diçka që nuk ishte lejuar deri tani./Telegrafi.