Gruevski-Kupchan: Nuk ekzistojnë kushte objektive për shtyrje të re të zgjedhjeve

Nikola Gruevski, kryetari i OBRM-PDUKM sot ka realizuar një takim me drejtorin për çështje evropiane nga Këshilli kombëtar për siguri, Charles Kupchan, transmeton Telegrafi Maqedoni.

Në takim është biseduar për sfidat aktuale politike, modalitetet për tejkalimin e krizës politike si dhe interesin strategjik të Maqedonisë për anëtarësim në Aleancën e NATO, njoftojnë nga OBRM-PDUKM.

„Nga të dyja palët u shpreh mendimi se kriza politike në Republikën e Maqedonisë zgjat tepër shumë dhe se është e domosdoshme të gjendet dalje nga kriza aktuale përmes mbajtjes së zgjedhjeve në të cilët populli do t’ia jep legjitimitetin përfaqësuesve politik të cilët kanë kapacitet ta kthejnë vendin në rrugën e reformave dhe të dedikohen për prosperitetin ekonomik.
Kryetari OBRM-PDUKM, Nikola Gruevski theksoi se kjo parti tërësisht i respekton dhe i realizon obligimet e marra nga marrëveshja ndërpartiake dhe se njëjtë si edhe më parë, nuk ekzistojnë kushte objektive për shtyrje të re të zgjedhjeve dhe zgjatje të mëtejme të krizës. Ai ka theksuar se nevojitet angazhim i sinqertë për të krijuar një ambient të mirëbesimit në të cilin asnjëra palë nuk do të mund ti kontestonte rezultate zgjedhore dhe vullnetin e qytetarëve. Gruevski ka përsëritur se zgjedhjet janë mënyra e vetme për dalje nga kriza.

Kryetari Gruevski është falënderuar për ndihmën e deritanishme të ShBA, me se është akorduar që komunikimi intensiv të vazhdojë edhe në periudhën e ardhshme për të gjithë çështjet dhe sferat e interesit të përbashkët”, thuhet në njoftimin partiak.