Gratë kanë shumë arsye për të protestuar

Nga një anë festohej, e në anën tjetër protestohej. Sheshi i Prishtinës ishte mbushur me shumë kalimtar por edhe më shumë shitës lulesh. E, ato që merrnin dhurata ishte gjinia femërore. Quhet si Dita ndërkombëtare e gruas. Më 8-të Mars të vitit 1910 në SHBA , Kanada e në vende të tjera të botës u bënë protesta të mëdha për të drejtat e gruas. Për çdo 8 Mars fëmijët në të gjithë botën ju dhurojnë nënave të tyre lule, e gjëra të tjera në shenjë dashurie për nënën.

Aktivitetet sot nuk munguan. U protestua në shesh nga disa përfaqësues të organizatave. Njëra ndër to ishte edhe drejtoresha e Platformës Civikos, Valdete Idrizi.

Idrizi në një prononcim për Telegrafin tha se ka dal të protestoj për t’i mbrojtur të drejtat e gruas në Kosovë.

“Nuk mendoj që duhet të shënohet 8 Marsi, pasi ende nuk kemi ardh në atë moment që duhet të festojmë, duke e ditur pozitën e gruas që e kemi në shoqëri. Gruaja ka potencial shumë më shumë për ndërtimin e shtetit. Në njërën anë kemi aq shumë probleme institucionale dhe kemi barriera të ndryshme dhe në tjetrën anë kemi mendësi ende patriarkale. Nëse kishim pas politika lehtësuese nga shteti në dhënien e kredive sepse me fuqizimin ekonomikisht të gruas shumë më pak do kishim dhunë në familje dhe shumë më shumë do kishim mirëqenie jo vetëm për gruan por edhe për shoqërinë”, tha Idrizi.

Ajo tha se ka shumë arsye që duhet të protestohet për dinjitetin dhe për shëndetin e gruas”.

Derisa në duart e saj kishte një trëndafil, ajo tha “Këtë e mora nga një mike e cila kishte dal për protestë. Duam vula e jo lule, por gjithsesi edhe lulet janë të mirëseardhura”.

E njëra nga organizatoret e kësaj protestë ishte edhe drejtoresha ekzekutive e Rrjetit të grave të Kosovës, Igballe Rugova. Ajo tha se kjo protestë është një mesazh për institucionet e Kosovës pasi ende ka dhunë në baza gjinore.

“I themi të gjithëve mjaft më me arsyetime. Ne dëshirojmë të mos ketë dhunë as në familje, as në rrugë, as në institucione prandaj jemi sot së bashku. Kemi edhe djem edhe burra që i janë bashkangjitur protestës dhe kjo për ne është shume me rëndësi. Nuk dëshirojmë që kjo ditë të jetë e nënës sepse ajo ditë duhet të jetë shumë e veçantë prandaj ne sot ‘Nuk festojmë, por marshojmë’”, tha ajo.

Përderisa gratë në sheshin e qytetit protestonin, në Kuvendin e Republikës së Kosovës u mbajt një dokumentar “Mendoj për ty”, organizuar nga Grupi i grave deputete të Kuvendit të Kosovës me iniciativë të zyrës presidenciale.

Ideja për aktivitetin e grumbullimit  të fustaneve nga të gjitha qytetet e Kosovës erdhi nga artistja Alketa Xhafa Mripa. Ndërsa inspirimi i saj erdhi si produkt i dhunës seksuale të gruas kosovare gjatë luftës së Kosovës.

Në një prononcim për Telegrafin, deputetja nga radhët e partisë Demokratike të Kosovës, Ganimete Musliu tha se është hera e dytë që e sheh këtë dokumentar dhe se emocionet janë të njëjtë si herën  e parë.

“Është bërë një punë kolosale e Alketës. Është një hap shumë i mirë për sensibilizimin e opinionit dhe kthimin e kësaj drejt kategorisë së grave apo qenieve njerëzore. Konsideroj që kjo të jetë një trampolinë ku ne si deputete edhe i gjithë opinioni shqiptarë nuk do duhej të ndalemi vetëm me dokumentare dhe fotografi por tashmë duhet të bëjmë edhe dosje  për t’i dërguar në vendin e duhur sepse pa u bo dosje këto vepra kriminale asnjëherë nuk do të ketë dritë dhe drejtësi për këto gra”,  tha ajo.

E sa i përket roli të gruas në shoqërinë kosovare ajo tha se: “Konsideroj që gratë në Kosovë kanë marr një rol nëpër të gjitha etapat e jetës të cilat janë dëshmuar për sukseset dhe sfidat. Gratë duhet të marrin sfidat dhe përgjegjësitë e tyre që duhet t’i bëjnë me përkushtim dhe të vazhdojnë të tregojnë rezultate siç kanë treguar deri më tani. Nuk jam e mendimit që grave t’i falet diçka duhet ti marrin ato që i meritojnë”, shtoi ajo, duke uruar kështu të gjitha femrat festën e 8-të marsit.

“Le të jetë kjo një nga të gjitha ditët e vitit, le të dominoj forca intelektuale dhe shpirtërore  e tyre”. /Telegrafi/