Gjykimi për videon e OBRM-PDUKM, mungojnë Mickoski dhe Ruskoska

Nis Gjykimi për padinë e prokurores Villma Ruskoska ndaj partisë opozitare OBRM-PDUKM-së. Në Gjykatën Civile nuk erdhën as Ruskoska e as përfaqësuesit e OBRM-PDUKM-së . Padia gjyqësore për shpifje është kundër kryetarit, Hristijan Mickoski, ish sekretarit të përgjithshëm Igor Janushev, OBRM-PDUKM dhe Koalicionit. Prokurorja kërkon 10 mijë euro për shpifje për përdorimin e saj në videot parazgjedhore të opozitës. Sipas avokatit të VMRO DPMNE-së, ajo ishte vetëm një sarkazëm dhe jo fyerje.

“Nuk ka sarkazëm dhe kritikë për një person që nuk merr pjesë në procesin politik për zgjedhjet e vitit 2020 dhe të abuzohet në këtë mënyrë. Kritikë publike po, për zyrtarët publik po, por me argumente. Në këtë rast, nuk ka asnjë argument për veprimin e saj të keq, në kundërshtim me dispozitat”, pohoi Pançe Eftov- avokat i Vilma Ruskoskës.

Për avokatin e opozitës, kontestuese është ekspertiza psikiatrike që Ruskoska e ka marrë nga një profesionist ku është diagnostikuar dhimbje shpirtërore nga dy klipet televizive, ku bën pjesë prokurorja.

“Paditësja ka pësuar dhimbje shpirtërore dhe gjithashtu ka pasur pagjumësi. E gjithë kjo e vë në pikëpyetje qasjen objektive dhe të paanshme të shefes së Prokurorisë për Krim të Organizuar, kundër të gjithë kundërshtarëve dhe të gjithë atyre që kanë qasje kritike qeverisë aktuale dhe gjithashtu kundër vetë OBRM-PDUKM-së”-tha Pançe Toshkovski, avokat i OBRM-PDUKM-së.

Avokati i Ruskovskës kërkoi që Gjykata civile t’i ngrijë 10 mijë euro nga llogaria e Koalicionit të udhëhequr nga OBRM-PDUKM-ja dhe paratë t’i paguajnë bashkërisht të pandehurit, Hristijan Mickoski, Igor Janushev, OBRM-PDUKM-ja dhe Koalicioni ose secili nga 2500 euro. Prokurorja Ruskovska theksoi se nëse e fiton gjyqin, paratë do t’i dhurojë në fshatin SOS të fëmijëve./Alsat/