GJND refuzon kërkesën e Bosnjës për gjenocidin e Serbisë

Gjykata Ndërkombëtare e Drejtësisë (GJND) ka hedhur poshtë kërkesën e Bosnjë Hercegovinës që të rishikojë atkvendimin e vitit 2007, ku Serbia u lirua nga akuzat për kryerjen e gjenocidit gjatë viteve të ‘90-ta të shekullit të kaluar.

Në letrën e Gjykatës Ndërkombëtare për Drejtësi, thuhet se gjykata nuk mund të rishikojë vendimin, sepse kërkesa për një gjë të tillë nuk ka ardhur nga të gjithë anëtarët e presidencës tripalëshe të Bosnjës.

Bakir Izetbegoviq, anëtari mysliman i presidencës së Bosnjës, ka iniciuar këtë kërkesë. Ai ka thënë se nuk e ka parë të nevojshme që të gjithë anëtarët e Presidencës të futen në kërkesën drejtuar gjykatës, sepse rekomandimi për një kërkesë të tillë fillimisht e ka bërë një avokat që ka prezantuar të gjithë Presidencën.

“Gjykata konsideron se përmbajtja e këtyre letrave tregon se një vendim i tillë nuk është bërë nga organi kompetent, në emër të Bosnjë Hercegovinës si shtet”, thuhet në përgjigjen e GJND-së.

Shumë zyrtarë në Bosnjë janë shprehur kundër kësaj kërkese, e cila u dërgua në shkurt, duke thënë se një gjë e tillë mund të nxisë kriza të reja politike në vend. /REL/