Benevento ka arritur një fitore sensacionale përballë Milanit 0-1 në San Siro.
Skuadra tanimë e rënë nga Serie A ka befasuar me ndeshje shumë të mira këtë edicion por fati nuk i ka përcjellë.
E padyshim më i miri në fushë ishte mbrojtësi shqiptar Berat Gjimshiti.
Reprezentuesi i Shqipërisë ka marrë lëvdata të mëdha nga mediat italiane pas ndeshjes.
Gjimshiti arriti të ndalë fillimisht dyshen Andre Silva dhe Patrick Cutrone, ndërsa më vonë edhe kroatin Nikola Kalinic.
Berat Gjimshiti gjatë një dueli me Andre Silvan (Foto: Tuttomeractoweb)
Kësisoj ai është vlerësuar lartë për paraqitjen e tij duke marrë notën 7 nga mediat italiane.
“Paraqitja më e mirë e sezonit për Gjimshitin. Nuk bëri asnjë gabim, madje në një moment ndërhyrja e tij ishte vendimtare pasi topi po shkonte në rrjetë”, thuhej në shkrimet e medieve italiane.
Benevento këtë edicion ka arritur të marrë katër pikë përballë Milanit pasi në shtëpi kishte barazuar 2-2.
Sa i përket mbrojtësit fantastik nga Tërnoci, Berat Gjimshiti këtë edicion ka qenë ndër lojtarët më të vlerësuar tek vendasit. /Telegrafi/
