Gjermania kundër pjesëmarrjes së talebanëve në Asamblenë e Përgjithshme të OKB-së

Gjermania thotë se ‘shfaqja’ e talebanëve në Asamblenë e Përgjithshme të Kombeve të Bashkuara (UNGA) nuk do të shërbente asgjë.

Gjermania ka shprehur kundërshtimin ndaj kërkesës së talebanëve për t’iu drejtuar UNGA-së, duke thënë se “shfaqja” nga sundimtarët e rinj të Afganistanit nuk do të shërbente për asnjë qëllim.

“Të caktosh një shfaqje në Kombet e Bashkuara nuk do të shërbejë asgjë”, u tha gazetarëve Ministri i Jashtëm gjerman, Heiko Maas.

“Ajo që është e rëndësishme janë veprat konkrete dhe jo vetëm fjalët, duke përfshirë të drejtat e njeriut dhe në veçanti të drejtat e grave dhe një qeverie gjithëpërfshirëse dhe distancimin nga grupet terroriste”, tha ai, raporton aljazeera.

Komiteti i kredencialeve i OKB -së, i cili përcakton se kush njihet si përfaqësues i një vendi të caktuar, nuk pritet të marrë një vendim mbi Afganistanin deri pas javës aktuale të takimeve dhe fjalimeve të nivelit të lartë.

Lexo po ashtu Talebanët kërkojnë të mbajnë fjalim në Asamblenë e OKB-së

Ndryshe, disa javë pasi e morën pushtetin në Afganistan, talebanët kanë kërkuar që t’u drejtohen liderëve botërorë me një fjalim në kuadër të Asamblesë së Përgjithshme të OKB-së e cila po i zhvillon punimet vjetore këtë javë në New York. /Telegrafi/