Gjeografi Tomor Qela: Kosova nuk humb territor nga demarkacioni

Gjeografi Tomor Qela, i cili në emisionin “Ora e Fundit” në Klan Kosova ka folur për Raportin e Komisionit për Demarkacionin e kufirit Kosovë – Mali i Zi, ka thënë se “Ekspertët nuk bëjnë demarkacion, këtë e bën shteti”.

“Një element që më ka bërë përshtypje është baza hartografike në këtë proces, si tematike, hartografike dhe kadastrale. Kurse elementi tjetër me rëndësi është debati që është mbajt me qytetarët atje. Raporti është konciz dhe profesional”, tha ai.

“Nëse analizojmë bazën statistike nga viti 1970-1980 del se sipërfaqja e Kosovës është 10.906 km katror, dhe nuk kam has të ketë sipërfaqe më të madhe. Nëse pretendohet se Kosova po humb 82 km katror, atëherë i bie se vendi ka 10.824 km katror dhe në shifra të tilla nuk kam hasur askund”, tha Qela.

“Gjatë analizave të mia kam gjetur edhe literaturë shkencore të mëhershëm, që janë marrë me këtë problematikë. Komuna e Pejës ka 603 km katror në bazë të literaturës, dhe kjo sipërfaqe është nëpër harta të ndryshme. Për çfarë humbje të territorit mund të flasim, kur del e njëjta sipërfaqe si nga viti 1979 edhe tash 2016. Ky proces ka shkuar konform bazës ligjore”, tha ai.

Në fund Qela ka një porosi për të gjithë akterët e këtij procesi. “Si ekspertë, qoftë edhe politikanë, në asnjë rast nuk duhet të largohemi nga baza administrative dhe kadastrale”.