Në Augsburger të Gjermanisë, afro 55 mijë njerëz është dashur të largohen nga shtëpitë, pasi është gjetur një bombë e pashpërthyer e Luftës së Dytë Botërore.
Bomba me peshë 1.8 ton, që i përket Forcave Ajrore Britanike, e gjetur në një vend ku po ndërtohej, ka detyruar që të bëhet evakuimi i shtëpive, përfshirë edhe spitalin e qytetit, transmeton Telegrafi.
Në ndihmë të qytetarëve kanë dalë afro 900 policë, të cilët kanë bartur të moshuarit, si dhe pacientët i kanë dërguar në një spital tjetër.
Banorët e larguar nga 32 mijë shtëpi, që kapin një rreze prej 1.6 kilometrash, janë vendosur në salla sporti, shkolla dhe qendra për ekspozita artistike.
Kjo bombë është më e madhja që është lëshuar nga britanikët, ndërsa ky është evakuimi më i madh që ka ndodhur në Gjermani, që nga Lufta e Dytë Botërore. /Telegrafi/
