Gjenden mbi 40 kilogramë kokainë në dërgesat e bananeve në marketet franceze

Dhjetra kilogramë kokainë janë gjetur në dërgesat e bananeve në katër dyqane të një zinxhiri supermarketesh franceze.

Stafi në degët e Grand Frais në rajonin Bourgogne-Franche-Comté në Francën lindore u habit kur gjeti midis 40-50 kilogramë të fshehura në dërgesat me banane dhe ishin të shqetësuar për të siguruar klientët se kokaina nuk kishte rënë në kontakt me fruta.

Tani detektivët po përpiqen të zgjidhin misterin se si droga, që besohet se e kishte origjinën në Kolumbi, erdhi në paleta dhe – më e rëndësishmja – për kë ishte e destinuar.

Olivier Caracotch, prokurori publik për Dijon, në Burgundy, tha se 10 kilogramë kokainë ishin gjetur në dyqanin Grand Frais në Beaune.

Midis 10-12 kilogramë të tjera u gjetën në dërgesa të ngjashme në tre dyqane, shkruan the Guardian, përcjell Telegrafi.

Një zëdhënës i Grand Frais tha: “Ne po punojmë ngushtë me policinë për të siguruar që hetimi të ecë pa probleme dhe që stafi dhe klientët tanë të jenë të sigurt.”

Supermarketi refuzoi të jepte informacione të mëtejshme.

Bananet duket se janë fruti i zgjedhur për trafikantët e drogës në Amerikën e Jugut, pas kapjes së një sërë ngarkesash kokaine në Evropë.

Pjesa më e madhe e kokainës e kishte origjinën nga Kolumbia.

Ndryshe, në korrik, qentë nuhatës gjetën 6,000 kilogramë kokainë me vlerë rreth 173 milionë paund të fshehura në një dërgesë bananeje në Ekuador që ishte destinuar për në Gjermani.

Në gusht, agjentët doganorë në qytetin verior grek të Selanikut zbuluan rreth 93 kilogramë kokainë në një anije nga Ekuadori që transportonte banane.

Në maj, rreth 250 kilogramë kokainë u gjetën të fshehura në kuti bananesh në një depo në Colmar në Francën lindore.

Policia gjeti gjithashtu një pajisje gjurmuese GPS në ngarkesë.

Detektivët besuan se droga ishte menduar të dërgohej në Gjermani, por ishte dërguar gabimisht në Francë.

Në mars, zyrtarët doganorë bullgarë kapën 170 kilogramë kokainë nga një anije që transportonte banane në Evropë nga Ekuadori, ndërsa një muaj më parë, zyrtarët britanikë thanë se kishin gjetur 5.7 ton kokainë në një dërgesë të ngjashme, më e madhja në histori të drogës të klasit A ​​në Mbretërinë e Bashkuar. /Telegrafi/