Komuna e Ferizajt gjatë viteve të fundit ka rekrutuar gjithsejtë 25 asistent nëpër institucione shkollore për t’u kujdesur për fëmijët me nevoja të veçanta. Punësimi i tyre ishte kërkesë e prindërve që kanë fëmijë me nevoja të veçanta. Me gjithë atë nevojat janë ende të mëdha për rekrutime të tilla pasi që sipas zyrtarëve komunal në këtë komunë janë rreth 100 fëmijë me nevoja të veçanta.
Afrim Llabjani, drejtor i Arsimit në Komunën e Ferizajt, ka thënë për Telegrafin se prej disa vitesh gradualisht kanë filluar me rekrutimin e Asistentëve për fëmijë me nevoja të veçantë në shkollat e Ferizajt.
“Rekrutimin e asistentëve e kemi bërë konform vendeve të lejuara sipas kërkesave gradualisht prej vitit 2019 e deri më 2025, kemi rekrutuar 25 asistentë për fëmijë me nevoja të veçanta, megjithatë, ky numër nuk është i mjaftueshëm për mbulimin e nevojave të domosdoshme për sigurimin e asistencës dhe kujdesit të fëmijëve të cilët i përkasin kësaj kategorie për lehtësimin dhe mundësimin që këta fëmijë të ndjekin procesin edukativ-arsimor në mënyrë sa më të lehtë. Në bazë të rritjes së rasteve të fëmijëve me nevoja të veçanta nëpër shkolla numri aktual i asistentëve për fëmijë me nevoja të veçanta është i pamjaftueshëm dhe është shumë e nevojshme që shërbimet për këtë kategori të fëmijëve të rritën në mënyrë që efikasiteti, kujdesi dhe tretmani të jenë sa më të mira”, ka thënë Llabjani./Telegrafi/