Gjashtë fitore nga gjashtë duele profesionale – Benjamin Imeri është i gatshëm të dhurojë spektakël këtë fundjavë

Boksieri profesionist shqiptar, Benjamin Imeri synon ta vazhdojë formën e jashtëzakonshme, me gjashtë fitore radhazi, kur të boksojë në këtë fundjavë.

Këtë të shtunë (16 nëntor), në “Osterman Arena” në Leverkusen të Gjermanisë, boksieri nga Gostivari shpreson t’i dëshmojë edhe njëherë cilësitë e tij.

Benjamini do të përballet me boksierin serb, Vanja Dumitrov – duke synuar që të marrë fitore të lehtë dhe të kërkojë një kundërshtar të rangut më të lartë.

Boksieri shqiptar do të ndeshet në kategorinë gjysmë të rëndë, derisa në matjet zyrtare ka peshuar 79 kilogramë.

Para duelit, Imeri ka thënë se është shumë i motivuar për ndeshjen e shtatë profesionale në karrierë dhe ka kërkuar që të gjithë tifozët shqiptarë të jenë prezentë në sallë.

“Jam i përgatitur për të zhvilluar ndeshjen e shtatë dhe për të sjellë një tjetër fitore për të gjithë ata që më përkrahin”, ka deklaruar boksieri 21-vjeçar.

“Pres mbështetjen e tifozëve shqiptarë në Osterman Arena për ta ndarë këtë moment së bashku me mua”.

Përballja pritet që të fillojë në ora 16:30 sipas kohës tonë lokale dhe Imeri është favorit absolut ndaj serbit që ka një rekord prej 41 humbjesh dhe vetëm katër fitore në gjithë karrierën e tij. /Telegrafi/