Stilisti italian i modës Giorgio Armani ka ndërruar jetë në moshën 91-vjeçare. Në intervistën e tij të fundit, të cilën e dha për "The Financial Times" disa ditë para vdekjes, ai foli hapur për jetën, karrierën dhe të vetmen gjë për të cilën pendohet.
Armani pranoi se gjatë gjithë jetës së tij i kushtoi shumë kohë punës dhe shumë pak njerëzve që i donte.
"Nuk do të thoja se isha një punëtor, por është e vërtetë që punova shumë. Besoj se puna e përkushtuar është çelësi i suksesit. Megjithatë, keqardhja ime më e madhe sot është se kalova shumë kohë duke punuar dhe shumë pak kohë me miqtë dhe familjen", tha Armani.
Ai foli gjithashtu për të ardhmen e shtëpisë së tij të modës pas vdekjes së tij, duke theksuar se procesi i trashëgimisë ishte planifikuar me kujdes.
"Kam vendosur që gradualisht përgjegjësitë që kam kryer personalisht t'ua transferoj atyre që u besoj më shumë dhe që janë më të afërt me mua", tha ai.
Frika nga vetmia ka qenë një temë që Armani e ka trajtuar më parë. Në një intervistë të vitit 2020 me The Guardian, ai pranoi: "Kam frikë të ndihem i vetmuar. Nuk mund të them se kam ndonjë keqardhje të veçantë, por nëse do të mund ta jetoja jetën time nga e para, do t'u kushtoja më shumë kohë miqve dhe familjes sime".
Perandoria e modës e Armanit ishte jashtëzakonisht e suksesshme, duke gjeneruar të ardhura vjetore prej 2.7 miliardë dollarësh, ndërsa vlera e pasurisë së tij totale vlerësohej në më shumë se 12.1 miliardë dollarë. Përveç veshjeve dhe aksesorëve të modës, perandoria e tij e biznesit përfshinte edhe parfume, kozmetikë, mobilje, libra, madje edhe çokollata dhe lule.
Sipas informacioneve të disponueshme, Armani i ka zgjedhur me kujdes pasardhësit e tij. Midis tyre janë motra e tij Rosanna, dy mbesa, një nip, bashkëpunëtori i tij prej kohësh dhe miku i ngushtë Leo Dell'Orco, si dhe një fondacion humanitar. Të gjithë ata kanë qenë të përfshirë më parë në menaxhimin e kompanisë dhe janë në bordin e drejtorëve të saj. Sipas statutit që Armani krijoi në vitin 2016, aksionet e kompanisë do të shpërndahen midis tyre.
Mbesat dhe nipi i tij tashmë mbajnë pozicione të larta brenda shtëpisë së modës, gjë që tregon se Armani ia besoi të ardhmen e kompanisë së tij familjes dhe bashkëpunëtorëve të tij më të ngushtë. /Telegrafi/
