Lajme Kosovë

Gërvalla nuk përmend datë për anëtarësim, por tregon përfitimet nga Këshilli i Evropës

Para 3 vitesh

Kosova sot edhe zyrtarisht aplikoi për anëtarësim në Këshillin e Evropës. Ministrja e Punëve të Jashtme, Donika Gërvalla, deklaroi se kjo është një ditë e rëndësishme për vendin, ndërsa nuk përmendi datë se kur pritet të ndodhë anëtarësimi.

Gërvalla listoi përfitimet e Kosovës në rast të anëtarësimit në Këshillin e Evropës.

“Së pari qasja për qytetaret e Republikës së Kosovës në Gjykatën Evropiane për të Drejtat e Njeriut në Strasburg, bërja pjesë e procesit të Bolonjës, i cili do të lehtësonte që studentët e profesionistët tanë në njohjen e diplomave dhe të profesioneve, Kongresi i Autoriteteve Lokale e Rajonale ku Asociacioni i Komunave, momentalisht ka një rol si vëzhgues, pastaj Kuvendi i Republikës së Kosovës që sot ka të drejtë të paraqesë kërkesën për të marrë statusin e mysafirit në Asamblenë e Përgjithshme të KiE-së, si dhe në mekanizmat e tjerë, etj. Se lista e përfitimeve është shumë e gjatë”, theksoi ajo në edicionin qendror të lajmeve në RTK.

Prandaj, sipas saj, aplikimi për anëtarësim në këtë organizatë është një ditë shumë e rëndësishme për Kosovën, por edhe për Këshillin e Evropës.

Ajo, veç tjerash, nuk përmendi data se kur mund të anëtarësohej Kosova në Këshillin e Evropës.

“Data për anëtarësim nuk mund ta themi, sepse ky është një proces i gjatë e që ka filluar sot. Proces në të cilin Kosova është mjaft e përgatitur për ta kaluar sa më shpejtë, por nuk duhet harruar se Këshilli i Evropës ashtu edhe Bashkimi Evropian dhe gjithë kontinenti ndodhet në një situatë të rëndë për shkak të luftës në Ukrainë. Prandaj nuk mund të themi ndonjë datë”, sqaroi ajo.

Më tej, ministrja Gërvalla shtoi se procesi i anëtarësimit varet nga angazhimi i institucioneve tona dha gatishmëria e BE-së.

Ndërkaq lidhur me reagimet e Serbisë për këtë angazhim të Kosovës për anëtarësim në Këshillin e Evropës, ministrja Gërvalla theksoi se Serbia do të duhej të merret me punët e saj të brendshme, që të deklarohet qartë në lidhje me disa çështje.

“Serbia duhet të deklarohet nëse është pro BE-së apo kundër, ne dimë se populli serb atje është dëshmuar kundër BE-së, pastaj të dëshmojë qartë planin për implementimin e sanksioneve ndaj Rusisë, të cilin ne dhe shtetet e rajonit e kemi bërë, si dhe të dëshmojë planin e procesit të dialogut me ne, të cilin e kemi filluar e vazhduar, por pa ndonjë vendim të zbatuar nga marrëveshjet e arrira në procesin e dialogut dhe, fundja, ne shpresojmë të dal në krah të shteteve tjera në përkrahje për anëtarësim tonin në Këshill të Evropës”, tha ajo.

Ndërsa për anëtarësimin e Kosovës në Këshillin e Evropës, ministrja Gërvalla deklaroi se ne duhet të punojmë fort në sigurimin e secilës votë.

Kosova duhet të sigurojë mbështetjen e të paktën tridhjetë shteteve për t’u anëtarësuar në Këshill të Evropës. Pas dorëzimit të aplikacionit gjatë të enjtes, shqyrtimi i të cilit nuk pritet të vonojë, institucioneve kosovare po iu kërkohet dinamikë më e madhe në diplomaci për sigurimin e votave për anëtarësim e Këshill të Evropës.