Gabimi që nuk duhet bërë kur blini online: Mos u bazoni gjithmonë te komentet e blerësve

Blerja online është bërë përditshmëri e jetës moderne. Njerëzit kur dëshirojnë të blejnë diçka online më tepër përcaktohen në bazë të komenteve të blerësve tjerë, që kanë marrë produktin e kërkuar para tyre, sesa në bazë të rejtingut.

Kërkimet e reja tregojnë se një përcaktim i tillë për blerje online është i gabuar, pasi që sasia e komenteve mbi objektin nuk përputhet me kualitetin e tij. Quartz raporton se një studim i bërë për blerjet në Amazon tregon se produktet online me më së shumti vlerësime ishin më të popullarizuara pavarësisht faktit se ato kishin rejting të ulët.

Pas studimit të 15.6 milionë vlerësimeve të më shumë se 350 mijë produkteve në Amazon, Derek Powell dhe ekipi i tij krijuan një model të statistikave për mënyrën se si blejnë njerëzit, transmeton KosovaPress.

Lifehacker sugjeron se njerëzit lexojnë përmbajtjen e vlerësimeve online para se të marrin vendim për të blerë. Nëse një produkt ka një numër të lartë të vlerësimeve të blerësve, kjo nuk do të thotë se ai është kualitativ, andaj sugjerohet që të shikohet rejtingu ku blerësit vlerësojnë produktin pasi që ta kenë blerë.