Formacioni i mundshëm i Shqipërisë ndaj Çekisë – Sylvinho i beson ‘senatorëve’

Përzgjedhësi i Kombëtares së Shqipërisë, Sylvinho, ka ndarë mendjen tashmë për formacionin anti-Çeki në kuadër të Ligës së Kombeve.

Shqipëria është nikoqire e Çekisë në ndeshjen e xhiros së pestë të Grupit 1 të Ligës B në Ligën e Kombeve, takim që pritet të zhvillohet në “Air Albania” me fillim nga ora 20:45.

Djelmoshat kuqezi kanë kryer të gjitha përgatitjet dhe janë gati për një rezultat të madh në shtëpi, pasi imperativi i vetëm është fitorja dhe përfundimi i grupit në pozitën e parë.

Trajneri Sylvinho ka ndarë tashmë mendjen për formacionin ‘anti-Çeki’ dhe pritet të startoj me rreshtimi 4-3-3 dhe me lojtarët më të mirë që ka në dispozicion.

Në portë do të jetë Thomas Strakosha, ndërsa në mbrojtje Ardian Ismajli dhe Arlind Ajeti në qendër, teksa Ivan Balliu dhe Mario Mitaj nga krahët.

Mesfusha do të jetë e dendur me tre lojtarë, ku Kristjan Asllani dhe Qazim Laqi, do të luajnë përkrah Ylber Ramadanit, i cili do të jetë në qendër.

Në sulm, Sylvinho do t’i besoj fanellën e titullarit Indrit Tucit në qendër, teksa do të jetë i ndihmuar nga Jasir Asani dhe Nedim Bajrami nga krahët. /Telegrafi/