Fitore të vështira për Nadal dhe Federer

Fitore të vështira me përmbysje për Rafael Nadal dhe Roger Federer në raundin e dytë të Us Open.

Dy favoritët e mëdhenj për suksesin final në grand-slamin nju-jorkez vuajtën shumë por në fund ja dolën të kualifikoheshin për më tej. Numri 1 i Botës Rafael Nadal nuk e nisi aspak mirë sfidën ndaj japonezit Taro Daniel që renditet i 121-të në klasifikimin e Atp.

Tenisti nipon e trembi jo pak spanjollin kur fitoi setin e parë me shifrat 6-3, megjithatë Nadal arriti të ndryshonte ritmin e lojës dhe u rikthye fuqishëm në 3 setet pasardhëse të cilat i fitoi me shifrat 6-3 6-2 6-2 dhe gjithë ndeshjen 3-1 për të avancuar në raundin e tretë aty ku do të sfidojë Leonardo Mayer.

Për Nadal misioni për të triumfuar për herë të tretë në karrierë në Flushing Meadows nuk do të jetë aspak i lehtë. Ashtu si në raundin e parë kundër talentit Frances Tiafoe edhe në raundin e dytë, zviceranit Roger Federer iu nevojitën plot 5 sete dhe 3 orë e 11 minuta lojë për të eliminuar rusin Mikhail Youzhny.

Edhe pse bilanci mes tyre përpara kësaj sfide fliste plotësisht në favor të mbretit Roger i cili kishte triumfuar në të 16-ta përballjet që kishin zhvilluar, Youzhny i shpalli luftë nga fillimi deri në fund, numrit 3 të Botës.

Federer fitoi lehtësisht setin e parë 6-1, ndërsa më pas vuajti presionin dhe goditjet fantastike të rusit duke humbur dy setet e tjerë me shifrat 6-7 dhe 4-6.

Gjithsesi eksperienca dhe fakti që di të menaxhojë siç duhet forcat në momentet e vështira bënë që Federer të mos lëshonte më terren duke fituar dy setet e tjera dhe gjithë ndeshjen 3-2.

Në raundin e 3-të kundërshtari i zviceranit do të jetë spanjolli Feliziano Lopez. Fitore të vështira edhe për dy favoritë të tjerë, austriakun Dominic Thiem dhe francezin Gael Monflis të cilët mposhtën respektivisht në 4 dhe 5 sete amerikanët Fritz dhe Young.

Te femrat pas Kontas, Halep dhe Wozniackit u eliminua një tjetër teniste favorite pikërisht rusja Svetlana Kuznetsova e cila u mposht në mënyrë surprizë nga japonezja Kurumi Nara e cila renditet e 116 në Botë. Avancoi më tej ndërkohë, polakja Agnieszka Radëanska që mposhti në 2 sete me shifrat 7-5 6-2, rusen tjetër Putintseva.