Ministri i Mjedisit, Planifikimit Hapësinor dhe Infrastrukturës, Liburn Aliu, ka njoftuar se kanë filluar punimet për ndërtimin e kyçjes në autostradën “Arbën Xhaferi” për të gjithë qytetarët e Vitisë.
Përmes një postimi në Facebook, Aliu ka bërë me dije se përmes kësaj kyçje do të zgjidhet një problem shumëvjeçarë për banorët e Vitisë dhe zonave përreth.
“Ka filluar puna për ndërtimin e kyçjes në Autostradën ‘Arbën Xhaferi’ për të gjithë qytetarët e Vitisë. Volume të shtuara në terren për ndërtimin e kyçjes në Autostradën ‘Arbër Xhaferi’ për të gjithë qytetarët e Vitisë, ku përmes kësaj kyçje, do të zgjidhim kështu një problematikë shumëvjeçare të banorëve të Vitisë dhe zonave përreth”.
Sipas tij, punimet pritet të përfundojnë për 175 ditë pune.
“Ju njoftojmë se punimet në projektin; ‘Ndërtimi i kyçjes në Autoudhën R-6 ‘Arbër Xhaferi’ në Viti’, pritet të përfundojnë në afatin e përcaktuar sipas kontratës për 175 ditë pune. Momentalisht është duke u punuar në Aksin 4 (Dalja nga Kaçaniku) dhe aksin 5 (Kyçja e Vitisë në drejtim të Prishtinës)”, ka shkruar Aliu në Facebook./Telegrafi/
