Fillimi i Muajit të Ramazanit, kreu i KMSH: Në këto kohë trazirash, lutemi për më shumë paqe e solidaritet

Kryetari i Komunitetit Mysliman të Shqipërisë, Bujar Spahiu uroi sot besimtarët në vigjilje të nisjes së Muajit të Bekuar të Ramazanit.

Në një njoftim në rrjetet sociale, Spahiu u shpreh se nesër myslimanët në Shqipëri dhe mbarë botën nisin një rrugëtim të lartësimit shpirtëror, moral, pse jo edhe shëndetësor.

“Të dashur besimtarë myslimanë dhe gjithë ju bashkëkombas brenda dhe jashtë Shqipërisë. Më lejoni që në emrin tim dhe të Komunitetit Mysliman të Shqipërisë, t’ju përcjell urimet më të përzemërta me rastin e fillimit të muajit të bekuar të Ramazanit”, ka thënë Spahiu.

Sipas kryetarit të KMSH, ramazani është muaj në të cilin mëshira, paqja dhe begatia e Zotit përfshin çdokënd.

“Ramazani është muaji i zbritjes së librit, Kuranit të Shenjtë. Libër i cili është fjala e Zotit që erdhi te ne nëpërmjet Profetit Muhamed (a.s.), është udhëzuesi ynë shpirtëror dhe social”, ka shtuar Spahiu.

“Në këto kohë të trazuara që po kalon bota, lutemi për më shumë paqe e solidaritet midis njëri-tjetrit dhe midis popujve e kombeve.
Lutemi për më shumë kujdes e vëmendje ndaj nevojtarëve, jetimëve, të moshuarve e fëmijëve. Rrugëtimi ynë i përbashkët kërkon motivacion të lartë, për t’i tejkaluar sfidat, për një të ardhme më të mirë të vendit”, ka thënë Spahiu.

“Së fundi, doja të uroja e inkurajoja përzemërsisht agjëruesit për herë të parë. Niseni agjërimin, është një adhurim që do t’ju ndryshojë jetën dhe këndvështrimin për të! I lutem Zotit të gjithësisë të na pranojë lutjet, adhurimet dhe çdo vepër të mirë në këtë muaj të bekuar”, ka thënë Spahiu. /Telegrafi/