Nëse po përpiqeni të përmirësoni shëndetin e zorrëve tuaja, me siguri keni hasur këshilla që përfshijnë një dietë të pasur me fibra dhe probiotikë. Ja një shpjegim më i detajuar pse disa ushqime janë të dobishme për zorrët tuaja
Edhe pse nuk preferohet të vihet përballë ushqimi i shëndetshëm me njëri-tjetrin, një pyetje që shtrohet shpesh është: Çfarë është më e rëndësishme për shëndetin e tretjes - fibrat apo ushqimet e fermentuara?
Sipas fjalëve të Dr. Vincent Pedre, internist i certifikuar dhe autor i librit “Protokolli GutSMART”, përgjigjja nuk është e thjeshtë, por ka disa të vërteta interesante.
Fibrat dhe ushqimet e fermentuara, ku qëndron dallimi?
Fibrat janë një lloj karbohidratesh komplekse që gjenden vetëm në bimë dhe nuk treten nga trupi. Për këtë arsye, ato ndihmojnë në ngopje, tretje, balancimin e sheqerit në gjak dhe ruajtjen e një ekuilibri të shëndetshëm të mikroorganizmave në zorrë. Ushqimet e pasura me fibra përfshijnë hikërrorin, elbin, lakrën jeshile, brokolin, thjerrëzat dhe shumë të tjera.
Nga ana tjetër, ushqimet e fermentuara krijohen përmes procesit të fermentimit, ku maja dhe bakteret shpërbëjnë sheqernat natyrale të ushqimit. Rezultati? Ushqime të pasura me probiotikë – ato “baktere të mira”. Në këtë grup përfshihen kombucha, kimchi, lakra turshi, pasta miso dhe kosi.
Pra, fibrat ushqejnë bakteret e mira që ndodhen tashmë në zorrë, ndërsa ushqimet e fermentuara rrisin numrin e tyre. Të dyja janë të domosdoshme për një tretje të shëndetshme dhe nuk mund të thuhet që njëra është më e rëndësishme se tjetra. Megjithatë, nëse sapo keni filluar të kujdeseni për shëndetin e zorrëve, mund të jetë më mirë të filloni me ushqimet e fermentuara dhe më pas të rrisni gradualisht marrjen e fibrave, transmeton Telegrafi.
Në një podcast të mindbodygreen, Dr. Pedre përmend një studim ku studiuesit krahasuan njerëzit që hanin 5 deri në 8 porcione fibrash në ditë me ata që hanin 6 gota ushqime të fermentuara. Rezultati? Grupi me ushqime të fermentuara kishte më shumë larmi të mikroorganizmave në zorrë dhe 19 tregues inflamacioni ishin ulur.
Grupi që konsumoi më shumë fibra gjithashtu pati përmirësime në përgjigjen imune dhe funksionin e mikrobiomës, por ushqimet e fermentuara patën një efekt më të fortë në reduktimin e inflamacionit. Me fjalë të tjera, mund të jetë e mençur të “qetësoni” fillimisht zorrët me ushqime të fermentuara dhe më pas t’i ushqeni ato me fibra.
Dr. Pedre gjithashtu thekson se nuk i pëlqeu fakti që fibrat dhe ushqimet e fermentuara u vunë “përballë” njëra-tjetrës në këtë studim, pa një grup kontrolli neutral. “Nuk mendoj se çështja është të zgjedhësh njërën apo tjetrën – përfitimi i vërtetë vjen kur i kombinojmë të dyja,” thekson ai.
Cilat janë ushqimet më të mira për shëndetin e zorrëve? Ende rekomandohet fuqimisht që të konsumoni si fibra, ashtu edhe ushqime të fermentuara. Të dyja janë të nevojshme për tretje optimale, por nëse keni probleme me zorrët ose inflamacion, filloni me ushqime të fermentuara. /Telegrafi/
