FFK njofton tifozët se kalimi i rrethojave do të ndëshkohet

Federata e Futbollit të Kosovës, ka njoftuar tifozët se mund të ndëshkohen në rast se kalojnë rrethojat e stadiumit dhe futen në fushë.

Në ndeshjen miqësore ndaj Danimarkës, disa tifozë u futën në fushë dhe ata janë dënuar.

Tani shtëpia më e madhe e futbollit kosovar, FFK ka njoftuar tifozët për masat që mund të merren.

“Federata e Futbollit e Kosovës fton të gjithë shikuesit në stadium që gjatë ndeshjes së sotme ta përkrahin Kombëtaren e Kosovës fuqishëm dhe me dinjitet, por në asnjë rrethanë të mos bëjnë veprime që janë të kundërligjshme, siç ishte rasti në ndeshjen miqësore kundër Danimarkës, kur dy shikues i kaluan rrethojat dhe u futën në fushën e gjelbër”.

“FFK u bën me dije shikuesve se çdo kalim i rrethojave dhe hyrje në fushë konsiderohet vepër penale dhe do të jetë i ndëshkueshëm në bazë të Ligjit për parandalimin e dhunës dhe Ligjit kundër huliganizmit dhe dukurive tjera negative në sport”.

“FFK beson fuqishëm se të gjithë shikuesit do të jenë të ndërgjegjshëm për pasojat që bartin veprimet e tilla dhe se nuk do të lejojnë që persona të pandërgjegjshëm të prishin imazhin e mirë që ka krijuar FFK-ja dhe vetë tifozeria jonë “Dardanët” në ndeshjet e këtilla”, thuhej në njoftimin e FFK-së. /Telegrafi/