FFK lëshon njoftim në lidhje me biletat e ndeshjes Çeki-Kosovë, jep këshilla dhe tregon si do të ndahen ato

Federata e Futbollit e Kosovës (FFK) ka lëshuar një njoftim sot (e premte) në lidhje me biletat e ndeshjes që Kosova e luan në udhëtim te Çekia.

Dardanët do të luajnë në udhëtim te Çekia ndeshjen e ardhshme eliminatore të vlefshme për grupin A për Euro 2020.

Interesimi edhe për këtë ndeshje është shumë i madh dhe FFK ka njoftuar për të gjitha detajet rreth këtij takimi.

Lexo po ashtu Të gjitha lajmet rreth Përfaqësueses së Kosovës

Njoftim lidhur me biletat e ndeshjes Çeki – Kosovë:

Duke kuptuar interesimin e jashtëzakonshëm të publikut dhe tifozëve për ta mbështetur Kombëtaren e Kosovës në sfidën më të rëndësishme deri tani, atë kundër Republikës Çeke, Federata e Futbollit e Kosovës me keqardhje të thellë është e detyruar t’u bëjë thirrje tifozëve që të mos bëjnë rezervime për fluturime dhe hotele, për shkak të numrit jashtëzakonisht të vogël të biletave që FFK-ja ka në dispozicion për këtë ndeshje.

Në bazë të nevojave, biletat që janë në dispozicionin tonë, do t’u akordohen grupimit të tifozëve “Dardanët”, kurse pastaj në bazë të obligimeve kontraktuale që ka, FFK-ja do të ndajë bileta për sponsorët, bashkëpunëtorët, institucionet si dhe në fund familjarët e futbollistëve.

Ne e çmojmë jashtëzakonisht shumë përkrahjen e pa-rezervë që marrim nga publiku në rrugëtimin drejtë ëndrrës për kualifikim dhe u jemi shumë mirënjohës të gjithë qytetarëve të Kosovës dhe mërgimtarëve që janë në gjendje të bëjnë shpenzime të pabesueshme vetëm për të qenë krah futbollistëve në këtë ndeshje, por në situatën në të cilën jemi, e kemi të pamundur të sigurojmë bileta për takimin që zhvillohet në Plzen.

Stadiumi ku zhvillohet ndeshja ka kapacitet të ultë dhe përkundër insistimit tonë, Federata Çeke e Futbollit ka refuzuar të ndaj numër pak më të madh biletash për sektorin e shikuesve mysafirë.

Ndeshja mes Kosovës dhe Çekisë është e paraparë të zhvillohet më 14 nëntor. /Telegrafi/